घातपात कि आत्महत्या ? पोलिसांना संशय ; अंगावर मारहाण केल्याचे आढळले व्रण
एरंडोल(प्रतिनिधी) – राज्याचे आदर्श शिक्षक पुरस्कारप्राप्त उपक्रमशील शिक्षक किशोर पाटील कुंझरकर यांचा मृतदेह आढळला असून त्यांच्या अंगावर व्रण आणि बनियान फाटलेला असल्यामुळे त्यांचा घातपात झाल्याचा संशय व्यक्त केला जात आहे. याबाबत पोलिसांचा तपास सुरु असून राज्यात शैक्षणिक क्षेत्रात खळबळ उडाली आहे. किशोर पाटील कुंझरकर हे गालापूर येथील जिल्हा परिषद शाळेत शिक्षक होते. ते भुसावळ येथे अनिल चौधरी यांच्या वाढदिवसानिमित्त शुभेच्छा देण्यास गेले होते.
याबाबत सविस्तर वृत्त असे कि , किशोर पाटील कुंझरकर बुधवारी सकाळी त्यांचा मृतदेह पळासदळ गावाजवळ हॉटेल फाऊटनच्यामागे आढळून आल्याने एकच खळबळ उडाली आहे .
त्यांचा मृतदेह ग्रामीण रुग्णालय एरंडोल येथे आणण्यात आला असून शवविच्छेदन झाल्यानंतर पुढील माहिती मिळू शकणार आहे. याबाबत पोलिस निरीक्षक ज्ञानेश्वर जाधव यांनी सांगितले की, मृतदेह रुग्णालयात असून शवविच्छेदन करणे बाकी आहे. शवविच्छेदन झाल्यानंतर मृत्यूचे खरे कारण कळू शकेल. तोवर पोलीस इतर चौकशी करीत आहेत. किशोर पाटील यांच्या अंगावरील कपडे फाटलेले आढळून आले आहेत. त्यामुळे हा घातपात आहे की आत्महत्या तसेच मृत्यूचे नेमके कारण काय हे शवविच्छेदन अहवालातून समजू शकणार आहे. पोलिसांनी याबाबत दक्षता ठेवली असून पुढील माहिती घेत आहे.
किशोर पाटील व त्यांची पत्नी हे दोघे शिक्षक आहे. तसेच किशोर पाटील हे विविध संघटनेशी निगडीत होते. मराठा महासंघावर नुकतीच त्यांची राज्य कार्याध्यक्ष म्हणून निवड झाली होती.
कोरोना काळात आदिवासी वस्तीवर ऑनलाईन शिक्षणात अनेक अडथळे येत असतानाअडचणींवर मात करीत प्रयोगशील प्रभारी मुख्याध्यापक किशोर पाटील कुंझरकर व त्यांच्या अर्धांगिनी शिक्षिका जयश्री पुरुषोत्तम पाटील यांनी “घर…घर..शाळा – शिक्षण, आपल्या दारी” हा उपक्रम राबवून आदिवासी वस्ती पर्यंत शिक्षण पोहचविले आहे.
