आंबेगाव (वृत्तसंथा) – शाळेची पिण्याच्या पाण्याची टाकी साफ करताना सदोष विद्युत पंपाचा धक्का बसल्यास सफाई कामगार तरूणाचा मृत्यू झाला. ही घटना 30 नोव्हेंबरला आंबेगाव पठारमधील केब्रीज शाळेमध्ये घडली. याप्रकरणी निष्काळजीपणा बाळगल्याप्रकरणी संचालकांसह पदाधिकारी आणि कंत्राटदाराविरूद्ध गुन्हा दाखल करण्यात आला आहे.
महादेव पायाळ (वय 38, रा. अपर, इंदिरानगर) असे मृत्यू झालेल्या सफाई कामगाराचे नाव आहे. याप्रकरणी संचालक चंद्रकांत कुंजीर यांच्यासह इतर पदाधिकारी आणि कंत्राटदार किशोर मोरे यांच्याविरूद्ध भारती विद्यापीठ पोलीस ठाण्यात गुन्हा दाखल करण्यात आला आहे. मीरा महादेव पायाळ (वय 33) यांनी याबाबतची तक्रार दिली आहे.
पोलिसांनी दिलेल्या माहितीनुसार, महादेव 30 नोव्हेंबरला आंबेगाव पठार परिसरातील केब्रीज शाळेतील पाण्याची टाकी साफ करीत होते. त्यावेळी विद्युत पंपाचा धक्का बसल्यामुळे महादेव यांचा जागीच मृत्यू झाला. मोटारपंप सदोष असतानाही कोणतीही उपाययोजना न करता हलगर्जीपणा केल्यामुळे महादेवचा मृत्यू झाल्याचे तपासात निष्पन्न झाले. त्यानुसार शाळेचे संचालक चंद्रकांत कुंजीर यांच्यासह ठेकेदार किशोर मोरे यांच्याविरूद्ध गुन्हा दाखल करण्यात आला आहे. याप्रकरणी भारती विद्यापीठ पोलीस तपास करीत आहेत.
