जळगाव (प्रतिनिधी) – जळगाव – शिरसोली रस्त्यावर मालवाहतूक वाहनाच्या धडकेत दुचाकीस्वार यशवंत मोतीलाल पाटील (वय 37) रा. शिरसोली हा गंभीर जखमी झाल्याची घटना ३० नोव्हेंबर सोमवारी रोजी सायंकाळी साडेसात वाजेच्या सुमारास घडली होती. आज खाजगी दवाखान्यात उपचार घेत असतांना त्याचा पहाटे मृत्यू झाला आहे. याबाबत जळगावातील एमआयडीसी पोलीस स्थानकात मयत पाटील यांच्या भावाच्या फिर्यादीवरून मालवाहतूक चालकाच्या विरोधात गुन्हा दाखल करण्यात आला आहे.
याबाबत सविस्तर माहिती अशी की, यशवंत मोतीलाल पाटील हे लग्न आपटून जळगावहुन शिरसोली येथे सोमवारी सायंकाळी साडेसात वाजेच्या सुमारास ते दुचाकी (क्र.-एम.एच.१९,ए.वाय.०९८६) घरी परतत असताना शिरसोली रस्त्यावरील कृष्णा लाँनच्या पुढे पी. एम. स्टाईल दुकानाच्या जवळ मालवाहतूक गाडी (क्र.-एम.एच.१९,एस.८२७५) या वाहनावरील चालकाने दुचाकीला जोरदार धडक दिली. यात यशवंत पाटील यांच्या डोक्याला व हातापायाला गंभीर दुखापत झाली होती. त्यांना जळगावात खासगी रुग्णालयात उपचारासाठी दाखल करण्यात आले होते. आज दि. २ डिसेंबर पहाटे उपचारादरम्यान पाटील यांचा मृत्यू झाला. याबाबत आज एमआयडीसी पोलीस स्टेशनला मयत यशवंत पाटील यांचे भाऊ भारत मोतीलाल पाटील (रा. शिरसोली प्र. बो.) याच्या फिर्यादीवरून मालवाहतूक चालकाविरुद्ध गुन्हा दाखल करण्यात आला आहे. पुढील तपास पीएसआय गणेश कोळी हे करीत आहेत.
