जळगाव (प्रतिनिधी) – तरसोद येथील आदर्श पोलीस पाटील गोकुळ शिरूड यांची सुकन्या प्रज्ञावंत कोमलीका शिरुड ही विद्यार्थिनी जे.ई.ई पूर्व परीक्षेत २०६५ श्रेणीत येऊन उज्वल यश संपादन केल्याबद्दल निसर्ग व सामाजिक प्रदूषण निर्मूलन समितीचे जिल्हा सहसचिव विजय लुल्हे यांच्या हस्ते शाल तसेच भारतरत्न प्रज्ञासूर्य डॉ . बाबासाहेब आंबेडकर यांचे चरित्र पुस्तक देऊन भावपूर्ण सत्कार केला.या प्रसंगी कोचिंग क्लासेस असोसिएशन C.C.A. महाराष्ट्र राज्य उत्तर महाराष्ट्र विभागीय अध्यक्ष प्रा.पंकज नाले यांनीही पुष्पगुच्छ देऊन सत्कार केला.सत्कारा प्रसंगी लुल्हे म्हणाले की, ” प्रतिकूल परिस्थितीत व्रतस्थपणे ध्येयप्राप्ती करणारे कोमलिका सारख्या प्रज्ञावंत विद्यार्थीनी दिपस्तंभासमान चिरकाल मार्गदशक असतात .” लुल्हेंनी यशाच्या गगनभरारीचे कौतूक करुन गुणवत्तेचा आलेख समजावून घेतला .
कोमलिकाने अत्यंत जिद्दीने परिश्रमपूर्वक पहिल्याच प्रयत्नात जे.ई.ई.ला २०६५ श्रेणी प्राप्त करुन उत्तुंग यशाला गवसणी घातली.वडील तरसोद येथे पोलीस पाटील असून त्यांची परिस्थिती बेताची आहे. क्लासची फी भरण्यासाठी एकदा कोमलीकाचे दागिने मोडावे लागले हा हळवा प्रसंग सांगतांना कोमलीकाच्या आईचा अश्रूचा बांध फुटला ! कोमलीकेने जळगावला इयत्ता बारावीचे शिक्षण मुळजी जेठा महाविद्यालयातील स्वामी विवेकानंद ज्युनिअर कॉलेजात घेऊन स्टेट बोर्ड परीक्षेत ८२.३१ % गुण तर इयत्ता १० वी चे शिक्षण सेंट जोसेफ कॉन्व्हेंट सिनियर सेकंडरी स्कूलला C.B.S.E. पॅटर्नमध्ये ९५ .२० % गुण प्राप्त केले होते. दहावीत नॅशनल टॅलेंट सर्च परीक्षेत व आठवीत महाराष्ट्र टॅलेंट सर्च परीक्षेतही यश खेचून आणले होते. इयत्ता पाचवीत राज्यस्तरीय विज्ञान ऑलंपियाड परीक्षेत सुवर्ण पदक प्राप्त करुन भविष्यातील उज्ज्वल यशोशिखर गाठण्याचे संकेत दिले होते.६ व्या इयत्तेतही ऑलंपियाड परीक्षेत द्वितीय श्रेणी आणि इयत्ता तिसरीत राष्ट्रीय प्रज्ञाशोध परीक्षेत पाचवी श्रेणी प्राप्त केली . चौथी व सातवी इयत्तेतही स्कॉलरशीप परीक्षेत लक्षवेधी यश मिळविले .
जनमत प्रतिष्ठानचे अध्यक्ष पी.के.नाले यांनी कोविड महामारी काळात उत्कृष्ट कार्य केल्या बद्दल प्रतिष्ठान तर्फे तरसोदचे आदर्श पोलिस पाटील गोकूळ शिरूड यांचा कोरोना योद्धा प्रमाणपत्र देऊन विशेष सत्कार केला.याप्रसंगी त्यांच्या जीवनसाथी सौ.अलका शिरुड व चिरंजीव भाग्येश शिरुड उपस्थित होते .
गोकूळ शिरुड हे तरसोदचे पोलीस पाटील पदी सन १९९७ पासून कार्यरत असून त्यांनी आपल्या कार्यकुशलतेने तरसोदला २०१२ / १३ वर्षी शासनाचा ” आदर्श गाव ” पुरस्कार मिळवून देण्यात मोलाचे योगदान दिले.महामारीच्या काळात उत्कृष्ट प्रशासन ठेवून साथ आटोक्यात आणल्याबद्दल नशिराबाद पोलिस स्टेशनचे ए.पी.आय साळुंके साहेबांनी शिरूड यांचा विशेष सत्कार केला.शिरूड यांचे द्वितीय सुपूत्र भाग्येश हा एम.जे कॉलेजमध्ये B.C.A. च्या अंतिम वर्षाला शिक्षण घेत आहेत. या हृदय भावसत्काराचे आभार प्रदर्शन भाग्येश शिरुड यांनी केले .
