बहिणीचा मृत्यू ; भाऊ रुग्णालयात
भावाला आले नैराश्य तर बहिणीच्या मृत्यूचे कारण अस्पष्ट
जळगाव (प्रतिनिधी) – तालुक्यातील भोलाणे गावी टाळेबंदीच्या काळात घरी आलेल्या बहीण भावाच्या आयुष्यात भाऊबीजेची संध्याकाळ दुर्दैवी ठरली. संध्याकाळी साडेसात वाजेनंतर एकवीस वर्षीय भावाने नैराश्यातून विष घेण्याचा प्रयत्न केला तर बहिणीने दहा मिनिटाच्या अंतरानंतर विष घेऊन आत्महत्याचा प्रयत्न केला. उपचारानंतर तिचा मृत्यू झाला आहे. भावाने नैराश्यतून तर बहिणीच्या मृत्यूचे कारण अस्पष्ट आहे. भाऊ खाजगी दवाखान्यात उपचार घेत आहे.
याबाबत तालुका पोलिस स्टेशनला बहिणीच्या मृत्यूबद्दल अकस्मात मृत्यूची नोंद झाली असून भावाच्या विषबाधेच्या प्रकरणाची देखील नोंद घेण्यात आली आहे. याबाबत पोलिसांकडून मिळालेली माहिती अशी की, गावातील सेवानिवृत्त एसटी महामंडळातील वाहक विजय कोळी हे पत्नीसह राहतात.ते मुंबई येथे नोकरीत होते. त्यांना दोन मुले आणि एक मुलगी असून ते त्यांच्या उल्हासनगर, जि. ठाणे येथील घरी राहात होते. तीनही मुले शिक्षणासाठी उल्हासनगर येथे होते. त्यात विश्वजीत विजय कोळी (वय २१) हा आर्किटेक्टचे शिक्षण घेत होता तर त्याचा मोठा भाऊ देवेश कोळी (वय २३), लहान बहीण अस्विता (वय १९) हे देखील त्याच्या सोबत राहत होते. टाळेबंदी सुरू झाली आणि त्यानंतर तिघेही भाऊ उल्हासनगर येथून घरी भोलाणे येथे आले होते.
सोमवारी १६ नोव्हेंबर रोजी पाडव्याचा आणि भाऊबीजेचा दिवस होता. याच दिवशी विश्वजितला अभ्यासाचं नैराश्य आलं. अभ्यासात मन लागत नाही म्हणून तो निराश झाला होता. या कारणास्तव त्याने घरातील विषाची बाटली घेतली आणि पिण्याचा प्रयत्न केला. मात्र घरातील नातेवाईकाने त्याच्या हाताला धक्का दिला आणि खबरदारी म्हणून त्याला उपचारासाठी रुग्णालयात दाखल केले. त्याच दरम्यान दहा मिनिटांच्या अंतरानंतर त्याची लहान बहीण अस्विता हिने देखील घराच्या बाहेर जाऊन विषप्राशन केले. कुटुंबियांच्या लक्षात आल्यावर तिला देवकर कॉलेजच्या प्रांगणात असलेल्या सामान्य रुग्णालयात उपचारासाठी दाखल केले असता तिचा उपचारा अंती मृत्यू झाला आहे.
याबाबत तालुका पोलिस स्टेशनच्या कर्मचाऱ्यांनी माहिती मिळताच घटनास्थळी धाव घेतली. घटनेची माहिती घेतली. उपचार घेणाऱ्या तरुणाचा पोलिसांनी जबाब घेतला. त्याने दिलेल्या जबाबमध्ये अभ्यासाच्या नैराश्यातून कृत्य करण्याचा प्रयत्न केला असे म्हटले आहे. मात्र त्याच्या बहिणीच्या मृत्यूचे कारण अद्यापही समोर आलेले नाही. नातेवाईकांची चौकशी सुरू असून पोलिस पुढील तपास करीत आहेत. मयत अस्विताच्या मृतदेहाचे मंगळवारी शवविच्छेदन करण्यात आले आहे. मृतदेह नातेवाईकांच्या ताब्यात देण्यात आला आहे. या घटनेमुळे भोलाणेसह जळगाव जिल्ह्यात हळहळ व्यक्त करण्यात येत असून तपास हेड कॉन्स्टेबल साहेबराव पाटील करीत आहेत.
