संपर्कप्रमुख संजय सावंत यांनी केली कार्यकर्त्यांची कानउघाडणी
जळगाव (प्रतिनिधी) – कार्यकर्त्यांनी मतभेदावर चर्चा करावी. कोणीही मनभेद ठेवू नये. गट-तट कोणीही बाळगू नये. अडचणीच्या वेळी पक्षातील प्रमुखांशी चर्चा करा. हवे तर मला फोन करा. आपण सर्व पदाधिकारी यापेक्षा बाळासाहेबांचे शिवसैनिक कसे राहतील यावर लक्ष ठेवावे. अंतर्गत हेवेदावे न ठेवता एकत्र राहिले पाहिजे अशा शब्दात शिवसेनेचे संपर्कप्रमुख संजय सावंत यांनी कार्यकर्त्यांची सोमवारी पदाधिकाऱ्यांसमोर कान उघाडणी केली.
शिवसेनेचे संपर्कप्रमुख संजय सावंत हे जळगाव जिल्ह्याच्या दोन दिवसीय दौऱ्यावर आले आहेत. दौऱ्यादरम्यान त्यांनी सोमवारी दिनांक 5 रोजी दुपारी एक वाजेपासुन कार्यकर्त्यांसह पदाधिकाऱ्यांची बैठक घेऊन काय अडचणी व नाराजी आहे हे जाणून घेण्याचा प्रयत्न केला. त्यानुसार त्यांनी कार्यकर्त्यांसह पदाधिकाऱ्यांना रिफ्रेश करण्याचा प्रयत्न केला. यावेळी पालकमंत्री गुलाबराव पाटील, जिल्हा प्रमुख गुलाबराव वाघ, शहर प्रमुख शरद तायडे, महापालिकेतील विरोधी पक्षनेते सुनील महाजन, नगरसेवक विष्णू भंगाळे, नितीन बर्डे, इब्राहिम पटेल, शामकांत सोनवणे यांच्यासह प्रमुख पदाधिकारी कार्यकर्ते बैठकीत उपस्थित होते. यावेळी कार्यकर्त्यांच्या अडीअडचणी आणि असलेल्या काही नाराजी संजय सावंत यांनी समजून घेतल्या. त्यावर विस्तृत चर्चा करून मार्गदर्शन देखील केले.
यावेळी बोलताना संजय सावंत यांनी सांगितले की, मी सोशल मीडियावर रोज अपडेट असतो. जळगावच्या काही व्हाट्सअप ग्रुपवर मी आहे. त्यावर मला शिवसेनेच्या घडामोडी कळतात. अनेक कार्यकर्ते हे तालुकाप्रमुखांना किंवा जबाबदार अधिकाऱ्यांना न सांगता आंदोलन किंवा कार्यक्रम करतात. यापुढे तालुका प्रमुखांना न सांगता कार्यकर्त्यांनी कार्यक्रम किंवा आंदोलन केले तर ते आंदोलन शिवसेनेचे राहणार नाही हे जाहीर करतो असे म्हणत त्यांनी आंदोलन पक्षातील सर्व पदाधिकाऱ्यांना व कार्यकर्त्यांना विश्वासात घेऊन करावे असे आवाहन केले.
पक्षाचा प्रोटॉकल पाळला पाहिजे. आपले जिल्ह्याचे पालक मंत्री हे पोटतिडकीने धावून जाणारे माणूस आहेत. त्यामुळे त्यांच्याशी संवाद ठेवत पक्षासाठी त्यांचा उपयोग करून घ्यावा. अमृत योजनेमुळे शहरातील रस्त्यांची कामे लगेच होऊ शकत नाही. मात्र डागडुजी करता येईल. त्यासाठी मागे लागले पाहिजे. कार्यकर्त्यांनी आमचे कोणीच समजून घेत नाही ही भावना मनात ठेवू नये. अडचणी आल्या तर गुलाबराव पाटील यांना सांगा. ते निरसन करतील. पण अंतर्गत हेवेदावे ठेवू नका. येणारी पुढील तीन महिने निघून गेले की शिवसेनेसाठी चांगले दिवस येणार आहेत. आपण सर्व एक आहोत त्यामुळे मी कार्यकर्ता असे न लक्षात घेता मी बाळासाहेबांचा शिवसैनिक हे लक्षात ठेवावे असे सांगून अनेक कार्यकर्त्यांचा एककल्ली कार्यक्रम सुरू असल्याची देखील माहिती मिळाल्याचे त्यांनी बैठकीत सांगितले.
