अमळनेर (प्रतिनिधी)- येथे अखिल भारतीय ग्राहक पंचायतच्या अमळनेर शाखेने वीज वितरण कंपनीशी निगडीत विविध प्रकारच्या समस्यांवर तेथील अधिकाऱ्यांशी सकारात्मक चर्चा केली. परिणामी आगामी काळात तक्रारी कमी होऊन ग्राहकांना चांगली व निर्दोष सेवा देण्याचे संबंधितांनी अभिवचन दिले.
ग्राहक पंचायतीतर्फे ६ जुलै रोजी अवाजवी बिलांच्या तक्रारी व वारंवार वीज पुरवठा खंडित होत असल्या बाबत निवेदन देण्यात आले होते. त्यानुषंगाने अतिरिक्त कार्यकारी अभियंता प्रशांत ठाकरे यांनी ग्राहक पंचायत अध्यक्ष व सदस्यांना २१ जुलै रोजी चर्चेसाठी पाचारण केले होते . ठाकरे यांनी वारंवार वीज पुरवठा खंडित होण्याची तांत्रिक कारणे सांगितली. त्यात प्रामुख्याने ताडेपुरा व प्रताप मिल फिडरवर क्षमतेपेक्षा जास्त विज भार असल्याने तो कमी करून नवीन फिडर तयार करण्याची गरज सांगितली. त्यामुळे वारंवार वीज पुरवठा खंडित होणार नाही. तसेच लॉकडाऊनच्या काळात कंटेनमेंट झोन मध्ये मान्सून पूर्व ची कामे पूर्ण झाली नाहीत. त्यामुळे पाऊस आल्यानंतर झाडाच्या फांदीचा जर तारेला स्पर्श झाला तरी ती ट्रीप होऊ शकते . या तक्रारींचे निवारण करण्याची कामे आता सुरू झाली आहेत. त्यामुळे हा त्रास पुढे होणार नाही, असे त्यांनी सांगितले. त्याचप्रमाणे कार्बन येणे, फ्यूज टाकणे आदी किरकोळ तांत्रिक बिघाड किंवा तक्रारींची कामे करताना वीज पुरवठा त्या त्या भागापुरता बंद करावाच लागतो हे स्पष्ट केले.
बिलांच्या तक्रारी आल्यानंतर त्या सोडवण्यात येतील. काहींचे लगेच निराकरण करून देण्यात आल्याचे त्यांनी सांगितले.
चालू महिन्यात ग्राहकांना वीज बिल घरपोच मिळतील अशी व्यवस्था करण्यात आली असल्याची माहिती दिली. ज्या ग्राहकांना वीज बिल मिळत नसतील त्यांनी शेजारच्या ग्राहकांच्या वीज बिलाची झेरॉक्स सोबत आणावी. जेणेकरून त्यांच्या चक्र मार्ग चुकला असल्यास तो दुरुस्त करण्यात येईल .परिणामी त्यांना घरपोच बिल पुढील महिन्यात मिळेल. बर्याचदा ग्राहकांना क्रेडिट बिल निघाल्यास ते देण्यात येत नाही. त्यामुळे ग्राहकांनी कार्यालयात येऊन बिल तपासून घ्यावे असेही त्यांनी सुचविले.
लॉकडाउनच्या काळात ठाकरे यांच्या कुशल नेतृत्वाखाली वीज पुरवठा खंडित होणार नाही याची त्यांनी व त्यांच्या सहकाऱ्यांनी विशेष काळजी घेतली. एक प्रकारे त्यांनी करोना योद्धा म्हणूनच काम केलेले आहे .त्याबद्दल ग्राहक पंचायतीतर्फे त्यांचे विशेष आभार मानण्यात आले. याप्रसंगी अतिरिक्त कार्यकारी सहाय्यक अभियंता निलेश कुरसंगे व वैभव देशमुख , ग्राहक पंचायतचे अध्यक्ष मकसूद बोहरी, सचिव विजय शुक्ल , ऊर्जा मित्र सुनील वाघ, ऍड. भारती अग्रवाल, योगेश पाने , प्रसिद्धीप्रमुख मेहराज हुसेन उपस्थित होते.
