
श्वान पकडणाऱ्या संस्थेच्या दोघांविरोधात गुन्हा दाखल
सावदा ( प्रतिनिधी ) – शहरातील बस स्थानकासमोरील पांडुरंग मेडिकल चौकात एका मोकाट कुत्र्याला अमानुषपणे मारहाण करून रिक्षातून नेल्याप्रकरणी सावदा पोलीस ठाण्यात दोघांविरोधात गुन्हा दाखल करण्यात आला आहे.


मिळालेल्या माहितीनुसार, जळगाव येथील बळीराम पेठ परिसरात राहणारे वकील तथा ‘संरक्षण गो व पशु सेवा संस्था’ या नोंदणीकृत संस्थेचे कार्यकर्ते केदार किशोर भुसारी (वय ४५) हे १७ नोव्हेंबर २०२६ रोजी जळगाव येथे होते. त्या दिवशी दुपारी अडीच वाजेच्या सुमारास त्यांचे मित्र तुषार प्रभाकर रोडे (रा. सावदा) यांनी त्यांना फोन करून सावदा येथील घटनेची माहिती दिली.
सावदा नगर परिषदेमार्फत शहरातील मोकाट कुत्र्यांना आळा घालण्यासाठी एका संस्थेला ठेका देण्यात आला आहे. त्यानुसार १७ नोव्हेंबर रोजी दुपारी २.१० वाजेच्या सुमारास बस स्थानकासमोरील पांडुरंग मेडिकल चौकात या संस्थेतील दोघांनी एका मोकाट कुत्र्यास पकडले. यातील अर्जुन अण्णा गायकवाड आणि सुनिल लक्ष्मण गायकवाड (दोन्ही रा. मुक्ताईनगर, जि. जळगाव) यांनी कुत्र्याच्या गळ्याला फास लावून व दोन्ही पाय धरून त्याला रस्त्यावर आपटून अमानुष मारहाण केली. त्यानंतर कुत्र्याच्या पायाला लंगड घालून रिक्षा (क्र. MH.19.BJ.3566) मध्ये टाकून ते निघून गेल्याचे तक्रारीत नमूद आहे.
या संपूर्ण घटनेचा व्हिडिओ मोबाईलवर चित्रित करण्यात आला असून तो मित्र राजेश भंगाळे यांच्या मोबाईलवर पाठवण्यात आला होता. हा व्हिडिओ पाहिल्यानंतर संस्थेच्या सभासदांशी चर्चा करून केदार भुसारी यांनी सावदा पोलीस ठाण्यात फिर्याद दिली. यावरून पोलिसांनी अर्जुन अण्णा गायकवाड आणि सुनिल लक्ष्मण गायकवाड यांच्याविरोधात गुन्हा नोंदवला असून, पुढील तपास पोलीस हवालदार उमेश अशोक पाटील हे करत आहेत.






