किरकोळ वादातून ग्राइंडर मशीनच्या कटरने गळ्यावर वार; केऱ्हाळे गावातील धक्कादायक घटना
रावेर ( प्रतिनिधी ) – तालुक्यातील केऱ्हाळे गावातील इंदिरा नगर परिसरात दारूच्या नशेत झालेल्या किरकोळ वादातून २३ वर्षीय तरुणाचा ६२ वर्षीय इसमाने खून केल्याची धक्कादायक घटना मंगळवारी (६ ऑक्टोबर) दुपारी सुमारास घडली. या घटनेने परिसरात खळबळ उडाली आहे.
या घटनेत राजू रवींद्र कापडे (वय २३, रा. इंदिरा नगर, केऱ्हाळे) याचा मृत्यू झाला आहे. तर रामसिंग चिंधू भिल (वय ६२, रा. इंदिरा नगर, केऱ्हाळे) याला पोलिसांनी ताब्यात घेतले आहे.
मिळालेल्या माहितीनुसार, रामसिंग भिल हा मिस्तरी काम करतो आणि तो एकटाच राहत असल्याचे सांगण्यात येते. मयत राजू कापडे हा त्याला जेवणाचा डबाही आणून देत असल्याची माहिती आहे. मंगळवारी दुपारी सुमारे दोन वाजेच्या सुमारास राजू हा रामसिंगच्या घरी गेला होता. त्यावेळी दोघेही दारूच्या नशेत असल्याचे सांगण्यात येते. यावेळी किरकोळ कारणावरून दोघांमध्ये शिवीगाळ व वाद झाला.
वादाचे रूपांतर हाणामारीत झाल्यानंतर रामसिंग याने मिस्तरी कामासाठी वापरण्यात येणाऱ्या ग्राइंडर मशीनच्या कटरने राजूच्या गळ्यावर वार केल्याचा आरोप आहे.या हल्ल्यात गंभीर जखमी झालेल्या राजूचा मृत्यू झाला.
घटनेची माहिती मिळताच रावेर पोलिसांनी घटनास्थळी धाव घेतली. पोलिसांनी आरोपी रामसिंग भिल याला ताब्यात घेतले आहे. दरम्यान, घटनेत आरोपीला देखील मार लागल्याने त्याला उपचारासाठी रुग्णालयात दाखल करण्यात आले आहे.
या प्रकरणी रावेर पोलिसांकडून पुढील तपास सुरू असून, खुनामागील नेमके कारण आणि घटनेचा संपूर्ण घटनाक्रम तपासला जात आहे. या घटनेमुळे केऱ्हाळे गावातील इंदिरा नगर परिसरात एकच खळबळ उडाली आहे.
