भुसावळमध्ये भरदिवसा घरफोडी; १ लाख २८ हजार ८०० रुपयांचे दागिने लंपास
मुख्य दरवाजाचे कुलूप तोडून चोरट्यांचा घरात प्रवेश; अज्ञात चोरट्याविरुद्ध गुन्हा दाखल
भुसावळ | प्रतिनिधी : भुसावळ शहरातील स्वामी विहार, दत्त मंदिराजवळील एका घराचे कुलूप तोडून अज्ञात चोरट्याने घरातील सोन्या-चांदीचे दागिने असा एकूण १ लाख २८ हजार ८०० रुपयांचा मुद्देमाल लंपास केल्याची घटना समोर आली आहे. याप्रकरणी भुसावळ शहर पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, धनराज नामदेव नाथ (वय ५९, व्यवसाय-नोकरी, भुसावळ रेल्वे) हे स्वामी विहार, दत्त मंदिराजवळ, जळगाव रोड, भुसावळ येथे कुटुंबासह राहतात. दि. २७ ऑगस्ट रोजी सायंकाळी ५.३० वाजेपासून ते २९ ऑगस्ट रोजी सकाळी ११ वाजेच्या दरम्यान ते घराबाहेर असताना ही चोरी झाली.
अज्ञात चोरट्याने घराच्या मुख्य दरवाजाचे कुलूप तोडून घरात प्रवेश केला. त्यानंतर कपाटातील सोन्या-चांदीचे दागिने व इतर मौल्यवान वस्तू चोरून नेल्या. घरातील चोरी झाल्याचे लक्षात आल्यानंतर फिर्यादीने पोलिसांना माहिती दिली.
दरम्यान, याच परिसरातील मोरेश्वरनगर येथे राहणाऱ्या एका नागरिकाच्या घरातही त्याच दिवशी चोरी झाल्याची माहिती परिसरातील नागरिकांकडून मिळाली आहे. त्यामुळे या घटनांमागे एकाच टोळीचा सहभाग आहे का, याबाबत पोलिसांकडून तपास केला जात आहे.
या प्रकरणी भुसावळ शहर पोलीस ठाण्यात गुन्हा क्रमांक १७६/२०२६ नुसार भारतीय न्याय संहितेच्या कलम ३०५(अ), ३३१(४), ३३१(३) अन्वये गुन्हा दाखल करण्यात आला आहे.
घटनेचा पुढील तपास पोउपनि पवन नायमने करीत आहेत. पोलिसांकडून परिसरातील सीसीटीव्ही फुटेज तपासण्यासह अज्ञात चोरट्याचा शोध सुरू आहे.
