डांभुर्णीतील गोळीबार प्रकरणी सरपंचाला अटक; गावठी पिस्तुलासह जिवंत काडतूस जप्त
यावल पोलिसांची कारवाई; पूर्ववैमनस्यातून गोळीबार केल्याची आरोपीची कबुली
यावल: तालुक्यातील डांभुर्णी येथे भरचौकात हवेत गोळीबार करून दहशत निर्माण केल्याप्रकरणी कोळन्हावी येथील विद्यमान सरपंच विकास उर्फ गोटू जगन्नाथ सोळंके (वय ३७) याला पोलिसांनी अटक केली आहे. त्याच्याकडून एक गावठी बनावटीचे पिस्तूल, मॅगझीन आणि एक जिवंत काडतूस जप्त करण्यात आले आहे.
पोलीस सूत्रांनी दिलेल्या माहितीनुसार, २७ ऑगस्ट रोजी रात्री आठ वाजेच्या सुमारास डांभुर्णी येथील चौकात गोळीबार झाल्याची माहिती मिळताच यावल पोलीस ठाण्याचे निरीक्षक रंगनाथ धारबळे यांच्या पथकाने घटनास्थळी धाव घेतली. घटनास्थळावरून रिकामी पुंगळी जप्त करून नागरिकांकडे चौकशी केली असता गोटू सोळंके याने गोळीबार केल्याचे निष्पन्न झाले. घटनेनंतर जळगावच्या दिशेने पळालेल्या सोळंके याला पोलीस उपनिरीक्षक अनिल महाजन आणि एलसीबीच्या सोपान गोरे यांच्या संयुक्त पथकाने मध्यरात्री कालंका माता मंदिर परिसरातून ताब्यात घेतले. जुन्या वादातून संबंधित मुलांवर दबाव आणण्यासाठी हवेत गोळीबार केल्याची कबुली आरोपीने दिली असून, त्याच्या शेतातून गोळीबारासाठी वापरलेले शस्त्र जप्त करण्यात आले. ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत यांच्या मार्गदर्शनाखाली पार पडली असून पुढील तपास पोलीस उपनिरीक्षक मैनुद्दीन सय्यद करत आहेत.
