जळगावात बैलांची अवैध वाहतूक रोखली; ४० हजारांचे दोन बैल जप्त
जळगाव : प्रतिनिधी — जनावरांना क्रूरतेने वागणूक देत कोणतीही वैद्यकीय कागदपत्रे, खरेदी-विक्रीची कागदपत्रे अथवा वाहतुकीसाठी आवश्यक व्यवस्था नसताना दोन बैलांची अवैधरीत्या वाहतूक केली जात असल्याचा प्रकार जळगाव तालुका पोलिसांनी उघडकीस आणला. खोटे नगर स्टॉप परिसरात केलेल्या कारवाईत सुमारे ४० हजार रुपये किमतीचे दोन बैल जप्त करण्यात आले आहेत.
२५ ऑगस्ट रोजी सकाळी साडेसात वाजेच्या सुमारास खोटे नगर स्टॉपजवळ ही कारवाई करण्यात आली. पोलिसांच्या माहितीनुसार, गजानन उखडू रामसे (वय ४८, रा. गुरुदत्त नगर, मानवसेवा शाळेजवळ, जळगाव) याच्याकडून दोन बैल आढळून आले.दोन्ही बैलांची अंदाजे किंमत प्रत्येकी २० हजार रुपये असून एकूण ४० हजार रुपयांचा मुद्देमाल पोलिसांनी ताब्यात घेतला.
पोलिसांच्या तपासात संबंधित बैलांना बाजारात विक्री करण्यासाठी घेऊन जात असल्याचे समोर आले. त्यांच्याकडे बैलांच्या खरेदी-विक्रीची कागदपत्रे, वैद्यकीय प्रमाणपत्र तसेच वाहतुकीसाठी आवश्यक असलेली कोणतीही व्यवस्था नसल्याचे आढळले.
बैलांना वाहन क्रमांक MH 48 T 3877 मध्ये बांधून त्यांची वाहतूक करण्यात येत होती. वाहनामध्ये जनावरांसाठी चारा व पाण्याचीही कोणतीही व्यवस्था नसल्याचे पोलिसांनी नमूद केले आहे.
या प्रकरणी जळगाव तालुका पोलीस ठाण्यात गु.र.नं. २५७/२०२६ अन्वये प्राण्यांचा छळ प्रतिबंधक अधिनियम १९६० चे कलम ११(१)(सी), ११(१)(डी), ११(१)(झेड) तसेच महाराष्ट्र पोलीस अधिनियम १९५१ मधील कलम ११९ अन्वये गुन्हा दाखल करण्यात आला आहे.पोलिसांनी दोन्ही बैल जप्त करून पुढील कायदेशीर प्रक्रिया सुरू केली आहे.
ही कारवाई पोलीस अधीक्षकांच्या मार्गदर्शनाखाली तसेच उपविभागीय पोलीस अधिकारी नितीन गणापुरे यांच्या सूचनेनुसार करण्यात आली. पोलीस निरीक्षक शशिकांत पाटील यांच्या मार्गदर्शनाखाली पथकाने कारवाई केली. प्रकरणाचा पुढील तपास पोना विजय अमृत निकम करीत आहेत.
