लोणी सिम गावातील कोकणमाता मंदिरात चोरी; ५९ हजारांचा मुद्देमाल लंपास
देवीच्या मूर्ती, चांदीचे सिंहासन, छत्री व सोन्याची माळ चोरट्यांनी पळवली; पारोळा पोलिसांत गुन्हा दाखल
पारोळा : तालुक्यातील लोणी सिम गावातील कोकणमाता मंदिरात अज्ञात चोरट्यांनी प्रवेश करून देवीच्या मूर्तींसह चांदीच्या व सोन्याच्या वस्तू असा एकूण ५९ हजार रुपये किमतीचा मुद्देमाल चोरून नेल्याची घटना समोर आली आहे. याप्रकरणी पारोळा पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
मध्यरात्री मंदिरात चोरी
पोलिसांत दाखल तक्रारीनुसार, १६ ऑगस्ट रोजी रात्री ९ वाजेपासून १७ ऑगस्ट रोजी पहाटे ४ वाजेच्या दरम्यान अज्ञात चोरट्यांनी लोणी सिम येथील कोकणमाता मंदिरात अनधिकृतपणे प्रवेश केला. मंदिरातील मौल्यवान वस्तूंवर डल्ला मारून चोरटे पसार झाले.
मूर्तींसह चांदी-सोन्याच्या वस्तू लंपास
चोरट्यांनी मंदिरातील अंदाजे २० हजार रुपये किमतीची १.५ ते २ किलो वजनाची कोकणमाता देवीची मूर्ती, तसेच २० हजार रुपये किमतीचे सुमारे १.०५ ते २ किलो वजनाचे चांदीचे सिंहासन चोरून नेले.
याशिवाय देवीच्या गळ्यातील अंदाजे ७ हजार रुपये किमतीची २ ग्रॅम वजनाची सोन्याची माळ, सुमारे १० हजार रुपये किमतीची २५० ग्रॅम वजनाची चांदीची छत्री आणि दानपेटीतील अंदाजे २ हजार रुपये किमतीच्या चांदीच्या वस्तू असा एकूण ५९ हजार रुपयांचा मुद्देमाल चोरीला गेला.
अज्ञात चोरट्याविरुद्ध गुन्हा
याप्रकरणी योगेश विठ्ठल पाटील (वय ४०, व्यवसाय शेती, रा. लोणी सिम, ता. पारोळा) यांनी दिलेल्या फिर्यादीवरून पारोळा पोलीस ठाण्यात गुन्हा क्रमांक ३२३/२०२६ नुसार भारतीय न्याय संहितेच्या कलम ३०५ प्रमाणे गुन्हा दाखल करण्यात आला आहे.
घटनेनंतर पोलिसांनी तपास सुरू केला असून, अज्ञात चोरट्यांचा शोध घेण्यात येत आहे. पुढील तपास पोलीस हवालदार शरद पाटील करीत आहेत.
