बॉम्ब शोधक श्वानाने पुण्यातील सहा महिन्यांचे प्रशिक्षण केले पूर्ण; ४०० पैकी ३७० गुणांची कमाई
जळगाव : जळगाव पोलीस दलाच्या श्वान पथकात बॉम्ब शोधक श्वान ‘गुरू’ याचा समावेश झाला आहे. श्वान पथकात नियुक्त असलेले पोलीस हेड कॉन्स्टेबल संदीप परदेशी आणि पोलीस हेड कॉन्स्टेबल निलेश झोपे यांच्यासह श्वान गुरूने पुणे येथील श्वान प्रशिक्षण केंद्रात सहा महिन्यांचे बेसिक प्रशिक्षण पूर्ण केले आहे. प्रशिक्षण पूर्ण केल्यानंतर तिघेही १५ ऑगस्ट २०२६ रोजी जळगाव श्वान पथकात हजर झाले.
श्वान गुरू हा बेल्जियन मालिनॉइस ब्रीडचा असून त्याचे वय एक वर्ष आहे. बॉम्ब शोधक म्हणून त्याला विशेष प्रशिक्षण देण्यात आले आहे. प्रशिक्षणादरम्यान गुरूने उल्लेखनीय कामगिरी करत ४०० पैकी ३७० गुण मिळविले आहेत.
गुरूच्या प्रशिक्षणामुळे जळगाव पोलिसांच्या श्वान पथकाची बॉम्ब शोध आणि सुरक्षाव्यवस्था अधिक सक्षम होण्यास मदत होणार आहे. सार्वजनिक ठिकाणे, महत्त्वाचे कार्यक्रम, गर्दीची ठिकाणे आणि संशयास्पद वस्तूंच्या तपासणीसाठी गुरूची मदत घेतली जाणार आहे.
पोलीस हेड कॉन्स्टेबल संदीप परदेशी (HC/534) आणि निलेश झोपे (HC/1926) यांनीही श्वान गुरूसोबत सहा महिन्यांचे बेसिक प्रशिक्षण पूर्ण केले आहे. प्रशिक्षित श्वान आणि त्याच्या हँडलर्सच्या माध्यमातून जळगाव जिल्ह्यातील सुरक्षा यंत्रणेला आणखी बळ मिळणार आहे.
