जिल्हापेठ पोलिसांची कारवाई; ४.१० लाखांचा मुद्देमाल जप्त
अवैध गौणखनिज वाहतूक करणाऱ्या हायवा चालकावर गुन्हा; शिवकॉलनी चौकातील कारवाई
जळगाव | प्रतिनिधी
जळगाव शहरातील शिवकॉलनी चौक परिसरात अवैधरीत्या गौणखनिजाची वाहतूक करणाऱ्या हायवा वाहनावर जिल्हापेठ पोलिसांनी कारवाई केली. या कारवाईत पोलिसांनी सुमारे ४ लाख रुपये किमतीचा हायवा ट्रक आणि १० हजार रुपये किमतीचे गौणखनिज, असा एकूण ४ लाख १० हजार रुपयांचा मुद्देमाल जप्त केला आहे.
पोलिसांनी दिलेल्या माहितीनुसार, १४ ऑगस्ट रोजी रात्री साडेतीन वाजेच्या सुमारास शिवकॉलनी चौक परिसरात हिरव्या-पिवळ्या रंगाच्या हायवा ट्रक क्रमांक MH-19-CX-7585 मधून गौणखनिज अवैधरीत्या वाहतूक केली जात असल्याचे निदर्शनास आले. वाहनचालक लोकेश दत्तू नन्नवरे (वय २२, रा. बाबोरी, जळगाव) हा शासनाची आवश्यक परवानगी न घेता गौणखनिजाची वाहतूक करताना आढळून आला.
पोलिसांनी वाहनाची तपासणी करून त्यातील गौणखनिजासह हायवा ट्रक ताब्यात घेतला. या कारवाईत दोन ब्रास गौणखनिजाची अंदाजे १० हजार रुपये किंमत आणि हायवा वाहनाची अंदाजे ४ लाख रुपये किंमत, असा एकूण ४ लाख १० हजार रुपयांचा मुद्देमाल जप्त करण्यात आला.
याप्रकरणी जिल्हापेठ पोलीस ठाण्यात भारतीय न्याय संहिता २०२३ मधील कलम ३०३(२), ४८(७), ४८(८) अन्वये गुन्हा दाखल करण्यात आला आहे. पोलीस हवालदार तुकाराम सोनवणे तपास करीत आहेत. कारवाईत जिल्हापेठ पोलीस ठाण्याच्या पथकाने महत्त्वाची भूमिका बजावली.
