भडगाव बस स्थानकावरून महिलेचे ५३ हजारांचे सोन्याचे दागिने व रोख लांबवली
गर्दीचा फायदा घेत अज्ञात भामट्याने मारला हात; पोलिसांत गुन्हा दाखल
भडगाव भडगाव बस स्थानक परिसरात प्रवाशांच्या गर्दीचा फायदा घेत अज्ञात भामट्याने एका तरुण गृहिणीचे ५३ हजार रुपये किमतीचे सोन्याचे दागिने आणि रोख रक्कम चोरून नेल्याची घटना उघडकीस आली आहे. या प्रकरणी भडगाव पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
मिळालेल्या माहितीनुसार, पाचोरा तालुक्यातील आखातवाडे येथील रहिवासी नेबीश फिरोज खान (वय २२) या बुधवारी (५ ऑगस्ट) दुपारी २:३० वाजेच्या सुमारास भडगाव बस स्थानकावर आल्या होत्या. यादरम्यान अज्ञात चोरट्याने त्यांच्या संमतीशिवाय ३५ हजार रुपये किमतीच्या सोन्याच्या दोन रिंगा (७ ग्रॅम), १५ हजार रुपयांच्या सोन्याच्या दोन बाळ्या (३ ग्रॅम) आणि ३ हजार रुपये रोख (५०० रुपयांच्या ६ नोटा) असा एकूण ५३ हजार रुपये किमतीचा ऐवज हुशारीने चोरून नेला.
आपल्या जवळील दागिने व पैसे चोरीला गेल्याचे लक्षात आल्यानंतर त्यांनी परिसरात शोध घेतला, मात्र चोरट्याचा कोणताही सुगावा लागला नाही. अखेर त्यांनी शुक्रवारी (७ ऑगस्ट) भडगाव पोलीस ठाणे गाठून फिर्याद दिली. त्यांच्या फिर्यादीवरून भारतीय न्याय संहिता (BNS) २०२३ चे कलम ३०३(२) अन्वये गुन्हा नोंदवण्यात आला आहे.
घटनेची माहिती मिळताच भडगाव पोलीस ठाण्याचे पोलीस निरीक्षक महेश टाक यांनी घटनेची दखल घेतली आहे. या प्रकरणाचा पुढील तपास पोलीस नाईक भूषण पाटील करत असून, बस स्थानक परिसरातील सीसीटीव्ही कॅमेऱ्यांचे फुटेज तपासून चोरट्याचा शोध घेतला जात आहे.
