सातपुड्यातील प्रसिद्ध मनूदेवी मंदिरात घरफोडी; देवीचे चांदीचे मुकुट व छत्र्या लांबवल्या
यावल पोलिसांत गुन्हा दाखल
यावल (जि. जळगाव): तालुक्यातील सातपुडा पर्वतरांगांमध्ये वसलेल्या उत्तर महाराष्ट्रातील लाखो भाविकांचे श्रद्धास्थान असलेल्या श्री मनूदेवी माता मंदिराच्या गाभाऱ्यात अज्ञात चोरट्याने घरफोडी करून मनूदेवी व रेणुका माता यांच्या मूर्तींवरील सुमारे १ लाख ३५ हजार रुपये किमतीचे दोन चांदीचे मुकुट आणि दोन छत्र्या चोरून नेल्याची धक्कादायक घटना उघडकीस आली आहे. या घटनेमुळे भाविकांमध्ये मोठी खळबळ उडाली आहे.
मिळालेल्या माहितीनुसार, ६ ऑगस्ट रोजी सायंकाळी ५.३० वाजता मंदिर नेहमीप्रमाणे बंद करण्यात आले होते. त्यानंतर रात्रीच्या वेळी अज्ञात चोरट्याने मंदिराच्या मुख्य चॅनल गेटचे कुलूप तोडले तसेच गाभाऱ्याच्या लाकडी दरवाजाचा कडी-कोंडा तोडून आत प्रवेश केला. चोरट्याने गाभाऱ्यातील मनूदेवी मातेच्या मूर्तीवरील ३०० ग्रॅम वजनाचा चांदीचा मुकुट (किंमत ₹४०,५००) व २०० ग्रॅमची चांदीची छत्री (किंमत ₹२७,०००) तसेच रेणुका मातेच्या मूर्तीवरील ३०० ग्रॅमचा चांदीचा मुकुट (किंमत ₹४०,५००) व २०० ग्रॅमची चांदीची छत्री (किंमत ₹२७,०००) असा एकूण १ किलो वजनाचा १ लाख ३५ हजार रुपयांचा मुद्देमाल लांबवला.
शुक्रवारी (७ ऑगस्ट) सकाळी ७ वाजेच्या सुमारास मंदिराचे पुजारी व सेवक आले असता हा चोरीचा प्रकार उघडकीस आला. या प्रकरणी आडगाव येथील रहिवासी शिवाजी प्रभाकर पाटील (वय ५१) यांच्या फिर्यादीवरून यावल पोलीस ठाण्यात भारतीय न्याय संहिता (BNS) कलम ३३१(३), ३३१(४) व ३०५(डी) अन्वये गुन्हा नोंदवण्यात आला आहे.
वरिष्ठ अधिकाऱ्यांकडून पाहणी
घटनेची माहिती मिळताच फैजपूर विभागाचे उपविभागीय पोलीस अधिकारी अनिल बडगुजर आणि यावल पोलीस ठाण्याचे पोलीस निरीक्षक रंगनाथ धारबळे यांनी तातडीने घटनास्थळी भेट देऊन पाहणी केली. या प्रकरणाचा पुढील तपास पोलीस निरीक्षक रंगनाथ धारबळे करत असून, चोरट्याचा शोध घेण्यासाठी पोलिसांचे पथक रवाना करण्यात आले आहे.
