भुसावळ बाजारपेठ पोलीस ठाण्यात तिघांविरुद्ध गुन्हा; तीन वर्षे शारीरिक संबंध ठेवल्यानंतर लग्नास नकार
भुसावळ ( प्रतिनिधी ) – लग्नाचे आमिष दाखवून एका २१ वर्षीय तरुणीवर तब्बल तीन वर्षे लैंगिक अत्याचार केल्याप्रकरणी भुसावळ बाजारपेठ पोलीस ठाण्यात एका तरुणासह त्याच्या आई-वडिलांविरुद्ध भारतीय न्याय संहिता (बीएनएस) अंतर्गत गुन्हा दाखल करण्यात आला आहे. या प्रकरणात मुख्य आरोपीने विवाहाचे आश्वासन देत पीडितेशी वारंवार शारीरिक संबंध ठेवले. त्यानंतर तिच्याकडील सुमारे १ लाख १० हजार रुपये किमतीची दुचाकी घेत विवाहास नकार दिल्याचा आरोप फिर्यादीने केला आहे.
पोलिसांनी दिलेल्या माहितीनुसार, पीडिता ही भुसावळ व पुणे येथे शिक्षण घेत होती. ऑगस्ट २०२३ ते जुलै २०२६ या कालावधीत मुख्य आरोपीने लग्नाचे आमिष दाखवून तिच्याशी शारीरिक संबंध ठेवले. तसेच तिच्याकडून बजाज कंपनीची प्लसर १२५ ही दुचाकी घेतल्यानंतर लग्न करण्यास नकार दिल्याचे फिर्यादीत नमूद करण्यात आले आहे.
याप्रकरणी मुख्य आरोपीसह त्याचे वडील आणि आई अशा तिघांविरुद्ध भारतीय न्याय संहितेतील संबंधित कलमान्वये गुन्हा दाखल करण्यात आला आहे. या प्रकरणाचा पुढील तपास भुसावळ बाजारपेठ पोलीस करीत आहे.
