एरंडोलमध्ये भरधाव ट्रकची कारला धडक; चालकाविरुद्ध गुन्हा दाखल
एरंडोल | प्रतिनिधी : धुळे-जळगाव महामार्गावरील जत्रा हॉटेलसमोर भरधाव ट्रकने कारला धडक दिल्याची घटना रविवारी (दि. २ ऑगस्ट) मध्यरात्री घडली. या अपघातात कारचे नुकसान झाले असून ट्रकचालकाच्या निष्काळजी वाहनचालनामुळे अपघात घडल्याप्रकरणी एरंडोल पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, एरंडोल पोलीस ठाण्यात सीसीटीएनएस गुन्हा क्रमांक १४५/२०२६ दाखल करण्यात आला आहे. या प्रकरणी भारतीय न्याय संहिता कलम २८१, ३२४(४) तसेच मोटार वाहन कायदा कलम १८४ अन्वये गुन्हा नोंदविण्यात आला आहे.
या प्रकरणी दीपक भास्करराव अहिरराव (वय ३७, रा. फापोरे, ता. अमळनेर, जि. जळगाव) यांनी फिर्याद दिली आहे.
फिर्यादीनुसार, २ ऑगस्ट रोजी रात्री सुमारे १२.३० वाजेच्या सुमारास ते आपल्या वाहनातून धुळेकडून जळगावकडे जात होते. एरंडोल शहरातील जत्रा हॉटेलसमोर स्पीड ब्रेकर असल्याने त्यांनी आपल्या वाहनाचा वेग कमी केला. त्याचवेळी मागून भरधाव वेगाने आलेल्या आरजे-११/जीडी-१४२६ क्रमांकाच्या ट्रकने त्यांच्या वाहनाला जोरदार धडक दिली. या धडकेत वाहनाचे नुकसान झाले.
या प्रकरणी संबंधित ट्रकचालकाविरुद्ध निष्काळजी व बेदरकारपणे वाहन चालवून अपघात घडविल्याचा गुन्हा दाखल करण्यात आला आहे.
या प्रकरणाचा पुढील तपास पोलीस हवालदार योगेश महाजन करीत आहेत.
