सावद्यात महिलेच्या घरातून गांजा जप्त; सावदा पोलिसांची कारवाई
सावदा: सावदा शहरातील ख्वाजानगर भागात राहणाऱ्या एका महिलेच्या घरात बेकायदेशीरपणे विक्री व वाहतुकीच्या उद्देशाने ठेवलेला गांजा पोलिसांच्या छाप्यात जप्त करण्यात आला आहे. या प्रकरणी सावदा पोलीस ठाण्यात एका महिलेविरुद्ध एनडीपीएस कायद्यांतर्गत (NDPS Act) गुन्हा दाखल करण्यात आला आहे.
पोलीस सूत्रांकडून मिळालेल्या सविस्तर माहितीनुसार, सावदा पोलीस ठाण्यातील पोलीस हवालदार निलेश जगतराव बाविस्कर (वय ४०) यांनी या प्रकरणी तक्रार दिली आहे. १ ऑगस्ट २०२६ रोजी रात्री ८.५१ वाजेच्या सुमारास सावदा शहरातील ख्वाजानगर येथील रहिवासी संशयित महिला हिच्या राहत्या घरात पोलिसांनी छापा टाकला.
या कारवाईदरम्यान तिच्या घरातून मानवी मेंदूवर आणि मज्जासंस्थेवर विपरीत परिणाम करणारी कॅनाबीस वनस्पती (सुकलेला गांजा) जप्त करण्यात आली. पोलिसांनी दिलेल्या माहितीनुसार, सुरुवातीला ६४६ ग्रॅम गांजा मिळून आला होता, मात्र लिफाफ्यात सील केल्यानंतर वजनासह तो ७०८ ग्रॅम भरला.
या प्रकरणी २ ऑगस्ट २०२६ रोजी पहाटे २.२० वाजता सावदा पोलीस ठाण्यात गुन्हा नोंद क्रमांक १९६/२०२६ नुसार स्वापषक औषधी द्रव्ये व मनोव्यापारावर परिणाम करणारे पदार्थ अधिनियम १९८५ (NDPS Act) च्या कलम २०(b) अन्वये गुन्हा दाखल करण्यात आला आहे.
या प्रकरणाचा पुढील सखोल तपास पोलीस उपनिरीक्षक राहुल शिवाजी सानप करत आहेत.
