दिवंगत मुलाच्या स्मृतिप्रीत्यर्थ चामकवाडीत सामाजिक बांधिलकीचा प्रेरणादायी उपक्रम
विद्यार्थ्यांना रेनकोट वाटप, वृक्षारोपणातून पर्यावरण संवर्धनाचा संदेश; दुर्गेश महाजन यांच्या प्रथम पुण्यस्मरणानिमित्त अनोखी मानवंदना
भडगाव
दिवंगत मुलाच्या स्मृती जपण्याचा सर्वात सुंदर मार्ग म्हणजे समाजोपयोगी कार्य, याची प्रचिती भडगाव तालुक्यातील चामकवाडी (कजगाव) येथे आली. दुर्गेश भानुदास महाजन यांच्या प्रथम पुण्यस्मरणानिमित्त जिल्हा परिषद वस्तीशाळा, चामकवाडी येथे विद्यार्थ्यांसाठी रेनकोट वाटप व वृक्षारोपण या दुहेरी सामाजिक उपक्रमाचे आयोजन करण्यात आले. या उपक्रमातून विद्यार्थ्यांच्या शैक्षणिक सुरक्षिततेबरोबरच पर्यावरण संवर्धनाचा प्रभावी संदेश देण्यात आला.
कजगावचे माजी उपसरपंच, सामाजिक कार्यकर्ते व ज्येष्ठ पत्रकार भानुदास हिलाल महाजन यांनी आपल्या सहकाऱ्यांच्या सहकार्याने हा उपक्रम राबवून दिवंगत पुत्राला सामाजिक कार्यातून भावपूर्ण श्रद्धांजली अर्पण केली. विद्यार्थ्यांना पावसाळ्यात सुरक्षितपणे शाळेत ये-जा करता यावी, यासाठी दर्जेदार रेनकोटचे वाटप करण्यात आले. तसेच शाळेच्या परिसरात विविध प्रकारच्या वृक्षांची लागवड करून पर्यावरण संरक्षणाची सामूहिक शपथही घेण्यात आली.
कार्यक्रमाच्या अध्यक्षस्थानी सादिक गणी मन्यार होते. प्रमुख पाहुणे म्हणून ज्येष्ठ पत्रकार प्रमोद लालवाणी, सरपंच विजय गायकवाड, पत्रकार बी. बी. भोसले, निलेश महाले, दीपक अमृतकर, अमीन पिंजारी, समाधान पाटील, आशुतोष पाटील, श्रेयश कासार, नितीन पाटील, माजी उपसरपंच शिवप्रसाद भालेराव यांच्यासह अनेक मान्यवर उपस्थित होते.
यावेळी ज्येष्ठ नागरिक बालू सोनवणे, एकनाथ भोई, अनिल चौधरी, सोपान महाजन तसेच सामाजिक क्षेत्रातील अनेक कार्यकर्ते, ग्रामस्थ, पालक आणि विद्यार्थी मोठ्या संख्येने उपस्थित होते. उपस्थितांनी दिवंगत दुर्गेश महाजन यांच्या स्मृतींना अभिवादन करून महाजन कुटुंबाच्या सामाजिक बांधिलकीचे कौतुक केले.
कार्यक्रमाचे प्रास्ताविक मुख्याध्यापक वसंत पाटील यांनी केले. त्यांनी शाळेच्या विकासासाठी समाजाच्या सहकार्याचे महत्त्व अधोरेखित करत अशा उपक्रमांमुळे विद्यार्थ्यांमध्ये आत्मविश्वास वाढत असल्याचे सांगितले. सूत्रसंचालन सुनील महाजन यांनी केले, तर आभार प्रदर्शनही वसंत पाटील यांनी मानले.
उपस्थित मान्यवरांनी विद्यार्थ्यांना शिक्षणाचे महत्त्व, स्वच्छतेच्या सवयी, वृक्षसंवर्धन, पर्यावरण संरक्षण आणि सामाजिक उत्तरदायित्व याबाबत मोलाचे मार्गदर्शन केले. प्रत्येक विद्यार्थ्याने एक झाड लावून त्याचे संगोपन करण्याचा संकल्प करावा, असे आवाहनही यावेळी करण्यात आले.
रेनकोट वाटपामुळे विद्यार्थ्यांना पावसाळ्यात शाळेत ये-जा करण्यास मोठी मदत होणार असून, वृक्षारोपणामुळे शाळेचा परिसर अधिक हिरवागार आणि पर्यावरणपूरक होण्यास हातभार लागणार आहे. विद्यार्थ्यांच्या चेहऱ्यावरील आनंद, ग्रामस्थांचा उत्स्फूर्त सहभाग आणि समाजहिताचा संदेश देणारा हा उपक्रम सर्वांच्या कौतुकाचा विषय ठरला.
