अमळनेर शहरासह तालुक्यात मुसळधार पावसाने हाहाकार
सखल भागात साचले पाणी, प्रशासनाकडून पूरपरिस्थितीची पाहणी
अमळनेर: शहरासह संपूर्ण तालुक्यात गेल्या अनेक तासांपासून सुरू असलेल्या मुसळधार आणि संततधार पावसामुळे सर्वसामान्य जनजीवन पूर्णपणे विस्कळीत झाले आहे. पावसामुळे शहरातील अनेक सखल भागांमध्ये गुडघाभर पाणी साचले असून रस्त्यांवरून पाण्याचे वेगवान लोट वाहत असल्याने नागरिकांचे आणि वाहनधारकांचे हाल होत आहेत. अनेक मार्गांवरील वाहतूक विस्कळीत झाली असून खबरदारीचा उपाय म्हणून नागरिकांनी सुरक्षित ठिकाणी आश्रय घेतला आहे.
सततच्या पावसामुळे परिसरातील नदी-नाले तुडुंब भरून वाहत असून तालुक्यात पूरसदृश परिस्थिती निर्माण झाली आहे. सखल वस्त्यांमध्ये पाणी शिरल्याने नागरिकांमध्ये चिंतेचे आणि भीतीचे वातावरण पसरले आहे. परिस्थितीचे गांभीर्य ओळखून महसूल व पोलीस प्रशासनाने तातडीने मदतकार्य सुरू केले असून आवश्यक त्या ठिकाणी आपत्कालीन उपाययोजना राबवल्या जात आहेत.
लोकनियुक्त नगराध्यक्ष डॉ. परीक्षित बाविस्कर आणि नगरसेवकांनी शहरात पुरस्थितीची पाहणी करून यंत्रणेला आवश्यक त्या सूचना केल्या. पूरपरिस्थितीचा प्रत्यक्ष आढावा घेण्यासाठी प्रांताधिकारी मयुर भंगाळे, तहसीलदार रुपेश सुराणा आणि पोलीस निरीक्षक दत्तात्रय निकम यांनी बाधित आणि सखल भागांना भेटी देऊन पाहणी केली. प्रशासनाने पाणी साचलेल्या भागातील नागरिकांना अत्यंत सतर्क राहण्याच्या सूचना दिल्या आहेत. तसेच नागरिकांनी नदी-नाल्यांच्या परिसरात जाणे टाळावे आणि आपत्कालीन परिस्थिती निर्माण झाल्यास तात्काळ प्रशासनाशी संपर्क साधावा, असे निर्देश अधिकाऱ्यांनी दिले आहेत.
सध्या महसूल, पोलीस आणि स्थानिक नगरपरिषद प्रशासन पूर्णपणे सतर्क मोडवर असून परिस्थितीवर बारकाईने लक्ष ठेवून आहे. पावसाचा जोर असाच कायम राहिल्यास नागरिकांनी विनाकारण घराबाहेर पडणे टाळावे आणि प्रशासकीय सूचनांचे तंतोतंत पालन करावे, असे आवाहन स्थानिक प्रशासनाच्या वतीने करण्यात आले आहे.
