सामाजिक संदेश देणाऱ्या नाटिकेने जिंकली उपस्थितांची मने
शिरसोली (प्रतिनिधी): शिरसोली येथील बारी समाज माध्यमिक विद्यालयात गुरुपौर्णिमेचा कार्यक्रम उत्साहपूर्ण आणि भक्तिमय वातावरणात साजरा करण्यात आला. कार्यक्रमाची सुरुवात गुरु महर्षी व्यास यांच्या प्रतिमेचे पूजन व पुष्पहार अर्पण करून झाली. कार्यक्रमाच्या अध्यक्षस्थानी शाळेचे मुख्याध्यापक मा. श्री. राजेंद्र आंबटकर सर होते.
कार्यक्रमात विद्यार्थ्यांनी गुरुमहिमेवर आधारित भाषणे, कविता, भक्तिगीते तसेच विविध सांस्कृतिक कार्यक्रम सादर केले. इयत्ता दहावी ‘अ’च्या विद्यार्थ्यांनी शाळेतील सर्व शिक्षक व शिक्षकेतर कर्मचाऱ्यांचा पुष्पगुच्छ आणि भेटवस्तू देऊन सन्मान केला व त्यांचे आशीर्वाद घेतले.
कार्यक्रमाचे प्रमुख आकर्षण ठरली “‘गुगल’ गुरु की ‘शिक्षक’ गुरु?” ही सामाजिक आशयाची नाटिका. या नाटिकेत आजच्या सोशल मीडियाच्या प्रभावाखाली जगणाऱ्या विद्यार्थ्यांचे वास्तव विनोदी शैलीत मांडण्यात आले. ‘गॅझेट क्वीन’ चिंगी, ‘गुगल बाबा’ आणि कुलकर्णी मॅडम या पात्रांमधील संवादातून गुगल माहिती देऊ शकतो, पण ज्ञान, संस्कार आणि जीवनमूल्ये केवळ शिक्षकच देऊ शकतात, हा प्रभावी संदेश विद्यार्थ्यांपर्यंत पोहोचवण्यात आला. विद्यार्थ्यांच्या दमदार अभिनयाला सर्वांनी उत्स्फूर्त दाद दिली.
यावेळी मुख्याध्यापक मा. श्री. राजेंद्र आंबटकर सर यांनी मार्गदर्शन करताना गुरु-शिष्य परंपरेचे महत्त्व विशद केले. शिक्षकांच्या मार्गदर्शनाखाली ज्ञान, संस्कार आणि चारित्र्याची जपणूक करून आदर्श नागरिक बनावे, तसेच तंत्रज्ञानाचा योग्य वापर करत शिक्षकांचा नेहमी आदर राखावा, असे आवाहन त्यांनी विद्यार्थ्यांना केले.
कार्यक्रमाचे आयोजन व सूत्रसंचालन इयत्ता दहावी ‘अ’च्या विद्यार्थ्यांनी उत्कृष्टरीत्या पार पाडले. पायल बारी, दीक्षा कोळी, भूमिका पाटील व भाग्यश्री बोरसे यांनी सूत्रसंचालन केले आणि शेवटी पल्लवी अस्वार हिने आभार प्रदर्शन करून कार्यक्रमाची सांगता केली.
या कार्यक्रमास शाळेचे प्रभारी पर्यवेक्षक श्री. एस. ए.भदाणे सर, तसेच ज्येष्ठ शिक्षक श्री. आर. के. पाटील सर, ए. टी. बावस्कर सर, डी. जी. कुलकर्णी सर, श्रीमती एस. पी. दुबे मॅडम, सौ. ए. आर. कोळी मॅडम तसेच इतर शिक्षकवृंद, शिक्षकेतर कर्मचारी आणि विद्यार्थी मोठ्या संख्येने उपस्थित होते. कार्यक्रमाच्या यशस्वीतेसाठी सांस्कृतिक विभागाचे प्रमुख श्री. जी. बी. काळे सर, सौ. एन. ए. अकोले मॅडम, श्रीमती दिपाली पाटील मॅडम कांचन धांडे मॅडम यांनी प्रयत्न केले. गुरुपौर्णिमेनिमित्त सादर करण्यात आलेल्या संदेशप्रधान नाटिकेमुळे संपूर्ण कार्यक्रम प्रेरणादायी, संस्कारमय आणि संस्मरणीय ठरला.
