भुसावळात घरात घुसून पिस्तुलाचा धाक दाखवत दरोडा; सात जणांविरुद्ध गुन्हा
भुसावळ | प्रतिनिधी : भुसावळ शहरातील श्रीराम नगर परिसरात एका कुटुंबाच्या घरात जबरदस्तीने घुसून पिस्तुलाचा धाक दाखवत दरोडा टाकल्याची घटना सोमवारी (२७ जुलै) पहाटे घडली. या प्रकरणी भुसावळ बाजारपेठ पोलीस ठाण्यात सात जणांविरुद्ध गंभीर कलमांन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपींनी पहाटे सुमारे २.३० वाजता फिर्यादीच्या घरात घुसून “चेतन कुठे आहे?” अशी विचारणा केली. त्यावेळी संबंधित व्यक्तीबाबत माहिती नसल्याचे फिर्यादीने सांगितल्याने आरोपी संतापले. त्यांनी घरातील सदस्यांना शिवीगाळ करत जीवे मारण्याची धमकी दिली. यातील एका आरोपीने पिस्तूल काढून फिर्यादी व त्यांच्या पतीला धमकावत चेतनचा पत्ता सांगण्याची मागणी केली.
यानंतर आरोपींनी संपूर्ण घराची झडती घेतली. घरातील पॅंटच्या खिशातून ₹८ हजारांची रोख रक्कम काढून ती जबरदस्तीने घेऊन पसार झाल्याचा आरोप फिर्यादीने केला आहे.
या प्रकरणी भुसावळ बाजारपेठ पोलीस ठाण्यात सात आरोपींविरुद्ध भारतीय न्याय संहिता (BNS) तसेच भारतीय शस्त्र अधिनियमातील संबंधित कलमांनुसार गुन्हा दाखल करण्यात आला आहे. घटनेचा पुढील तपास भुसावळ बाजारपेठ पोलीस करीत आहे.
