३० हजार रुपयांचा ऐवज चोरी; अज्ञात चोरट्याविरुद्ध जिल्हापेठ पोलीस ठाण्यात गुन्हा
जळगाव (प्रतिनिधी): शहरातील बी.जे. मार्केट परिसरातील एका गॅरेजचे कुलूप फोडून बुलेट मोटारसायकलीचे सुटे भाग चोरून नेल्याची घटना उघडकीस आली आहे. या प्रकरणी अज्ञात चोरट्याविरुद्ध जिल्हापेठ पोलीस ठाण्यात गुन्हा दाखल करण्यात आला असून, चोरीस गेलेल्या मालाची किंमत सुमारे ३० हजार रुपये असल्याचे पोलिसांनी सांगितले.
फिर्यादी अनिल पांडुरंग पाटील (वय ६०), व्यवसाय – गॅरेज मेकॅनिक, रा. आयोध्यानगर, जुनी एमआयडीसी, जळगाव यांनी दिलेल्या फिर्यादीनुसार, त्यांचे बी.जे. मार्केट परिसरातील लक्ष्मी गॅरेज हे २१ जुलै रोजी रात्री बंद करण्यात आले होते. २२ जुलै रोजी सकाळी गॅरेज उघडले असता अज्ञात चोरट्याने कुलूप फोडून आत प्रवेश केल्याचे निदर्शनास आले.
चोरट्याने गॅरेजमधून बुलेट मोटारसायकलची दोन इंजिने, दोन क्लच कव्हर, दोन गिअर बॉक्स कव्हर, दोन हेड, चार मॅग व्हील तसेच दोन शॉकअप पाईप असा एकूण सुमारे ३० हजार रुपयांचा ऐवज चोरून नेला.
या प्रकरणी जिल्हापेठ पोलीस ठाण्यात भारतीय न्याय संहिता (BNS) २०२३ मधील संबंधित कलमांनुसार अज्ञात आरोपीविरुद्ध घरफोडीचा गुन्हा दाखल करण्यात आला आहे. पुढील तपास पोलीस हवालदार किरण वानखेडे करीत असून, अद्याप आरोपीचा शोध लागलेला नाही.
