भुसावळ महावितरण कार्यालयाबाहेर कारवाई; मंजुरी व रिलिज ऑर्डरसाठी मागितली होती लाचेची रक्कम
भुसावळ (प्रतिनिधी): महावितरणकडून सोलर सिस्टीम बसविण्याची मंजुरी व रिलिज ऑर्डर देण्यासाठी दोन हजार रुपयांची लाच स्वीकारताना अतिरिक्त कार्यकारी अभियंत्याला लाचलुचपत प्रतिबंधक विभागाच्या (एसीबी) पथकाने रंगेहाथ पकडले. ही कारवाई बुधवारी (२२ जुलै) दुपारी भुसावळ येथील महावितरणच्या अतिरिक्त कार्यकारी अभियंत्यांच्या कार्यालयाबाहेर करण्यात आली.
या प्रकरणी नितीन अभिमन्यू पाटील (वय ४९), अतिरिक्त कार्यकारी अभियंता, महावितरण, भुसावळ यांच्याविरुद्ध भ्रष्टाचार प्रतिबंधक कायदा, १९८८ च्या कलम ७ अन्वये भुसावळ शहर पोलीस ठाण्यात गुन्हा दाखल करण्यात आला आहे.
तक्रारदार यांच्या पत्नीच्या नावाने सोलर सिस्टीम विक्रीची एजन्सी असून, ग्राहकांच्या सोलर प्रकल्पांना महावितरणकडून मंजुरी व रिलिज ऑर्डर मिळवून देण्यासाठी ऑनलाईन प्रस्ताव सादर करण्यात आले होते. भुसावळ येथील दोन ग्राहकांच्या सोलर सिस्टीम मंजुरीची प्रक्रिया पूर्ण करून रिलिज ऑर्डर देण्यासाठी आरोपी अधिकाऱ्याने प्रत्येकी १ हजार रुपये, असे एकूण २.हजार रुपयांची लाच मागितल्याची तक्रार एसीबीकडे करण्यात आली होती.
तक्रारीची पडताळणी केल्यानंतर एसीबीने सापळा रचला. त्यानुसार आरोपीने तक्रारदाराकडून दोन हजार रुपयांची लाच स्वीकारताच पथकाने त्याला रंगेहाथ पकडले.
ही कारवाई पोलीस उपअधीक्षक योगेश ठाकूर यांच्या मार्गदर्शनाखाली लाचलुचपत प्रतिबंधक विभागाच्या पथकाने केली. पुढील तपास सुरू आहे.
