अस्पष्ट फोटोच्या आधारे रावेर रेल्वे स्थानक परिसरातून ताब्यात; आर्थिक कारणातून हत्या केल्याची प्राथमिक माहिती
रावेर (प्रतिनिधी) – अमरावती ग्रामीण जिल्ह्यातील मोर्शी पोलीस ठाण्याच्या हद्दीत ट्रकच्या केबिनमध्ये जळालेल्या अवस्थेत ट्रकचालकाचा मृतदेह आढळून आलेल्या प्रकरणातील संशयिताला रावेर पोलिसांनी काही तासांतच ताब्यात घेतले. संशयित पंजाबकडे पळून जाण्याच्या तयारीत असल्याची माहिती मिळताच रावेर पोलिसांनी तातडीने शोधमोहीम राबवत ही कारवाई केली.
माहितीनुसार, मोर्शी पोलीस ठाण्याच्या हद्दीत उभ्या असलेल्या ट्रकच्या केबिनमध्ये ट्रकचालकाचा जळालेला मृतदेह आढळला होता. पुरावे नष्ट करण्यासाठी आणि मृत्यूचे खरे कारण लपविण्याच्या उद्देशाने ट्रकला आग लावण्यात आल्याचा संशय व्यक्त करण्यात आला होता.
आज सकाळी सुमारे ८.४८ वाजता अमरावती ग्रामीणचे पोलीस अधीक्षक यांनी जळगाव जिल्हा पोलीस अधीक्षकांशी संपर्क साधून संशयित रावेर रेल्वे स्थानक परिसरात असल्याची आणि पंजाबकडे पळून जाण्याच्या तयारीत असल्याची माहिती दिली. रावेर पोलिसांकडे संशयिताचा केवळ एक अस्पष्ट फोटो उपलब्ध होता.
या माहितीच्या आधारे पोलीस निरीक्षक संदीप पाटील यांच्या नेतृत्वाखाली रावेर पोलीस ठाण्याच्या पथकाने तातडीने शोधमोहीम राबवून संशयिताला ताब्यात घेतले.
ताब्यात घेण्यात आलेल्या संशयिताची ओळख मनप्रीतसिंह कश्मीरसिंह रंधावा (वय 48, रा. मंध्रवाला, ता. अजनाडा, जि. अमृतसर, पंजाब) अशी आहे. प्राथमिक चौकशीत आर्थिक कारणातून ट्रकचालकाचा गळा आवळून खून केल्यानंतर पुरावे नष्ट करण्यासाठी ट्रकला आग लावल्याची माहिती समोर आल्याचे पोलिसांनी सांगितले.
संशयिताकडून पांढऱ्या रंगाची आयशर ट्रक (क्रमांक PB-02-EW-4299) जप्त करण्यात आली असून, पुढील कायदेशीर कारवाईसाठी अमरावती ग्रामीण पोलीस पथक जळगावकडे रवाना झाले आहे.
