उसणे दिलेल्या पैशांवरून संताप; लोखंडी सळईने मारहाण करून जीवे मारण्याची धमकी
पाचोरा (प्रतिनिधी) : उसणे दिलेल्या दोन हजार रुपयांच्या वादातून ६५ वर्षीय वृद्धावर लोखंडी सळईने हल्ला करून गंभीर दुखापत केल्याची धक्कादायक घटना पाचोरा शहरात घडली. या प्रकरणी एका संशयिताविरुद्ध पाचोरा पोलीस ठाण्यात भारतीय न्याय संहिता (BNS) अंतर्गत गुन्हा दाखल करण्यात आला आहे.
पोलीसांनी दिलेल्या माहितीनुसार, गोपाळ महादू कोळी (वय ६५, रा. मानसिंग कॉलनी, पाचोरा) यांनी दिलेल्या फिर्यादीवरून हा गुन्हा दाखल करण्यात आला आहे. ही घटना १२ जुलै २०२६ रोजी सकाळी सुमारे ७.५० वाजता जारगाव चौफुली परिसरातील एका दुकानासमोर घडली.
तक्रारीनुसार, आरोपी समद रियाज (रा. हनुमान नगर, पाचोरा) हा फिर्यादीकडे आला आणि “तुम्ही मला उसणे दिलेले दोन हजार रुपये का मागता आणि माझ्याविरोधात पोलीस ठाण्यात तक्रार का करता?” असा जाब विचारत वाद घालू लागला. वादाचे रूपांतर मारहाणीत झाले आणि आरोपीने लोखंडी सळईने फिर्यादीवर हल्ला करून गंभीर दुखापत केली.
यावेळी आरोपीने शिवीगाळ करत पुन्हा तक्रार केल्यास जीवे मारण्याची धमकी दिल्याचेही फिर्यादीत नमूद करण्यात आले आहे.
या प्रकरणी पाचोरा पोलीस ठाण्यात गुन्हा क्रमांक ३३७/२०२६ दाखल करण्यात आला असून भारतीय न्याय संहिता (BNS) कलम ११८(२), ३५२ व ३५१(२) अन्वये गुन्ह्याची नोंद करण्यात आली आहे.
या प्रकरणाचा पुढील तपास पोलीस कर्मचारी संजय काळे करीत असून, वृत्त लिहिपर्यंत आरोपीला अटक करण्यात आलेली नव्हती.
