मेहू-टेहूजवळ मध्यरात्री भीषण अपघात; निष्काळजी वाहनचालकाविरुद्ध गुन्हा
पारोळा (प्रतिनिधी ) – पारोळा-कजगाव मार्गावरील मेहू-टेहू गावाजवळ भरधाव वेगाने व निष्काळजीपणे चालविण्यात आलेल्या कॅम्पर वाहनाच्या धडकेत एका कंपनीच्या सुपरवायझरचा दुर्दैवी मृत्यू झाल्याची घटना घडली. या प्रकरणी पारोळा पोलिस ठाण्यात वाहनचालकाविरुद्ध गुन्हा दाखल करण्यात आला आहे.
मिळालेल्या माहितीनुसार, मृताचे नाव विश्व विजयचंद्र कौशिक (वय २५, रा. गोरखपूर, उत्तर प्रदेश) असे आहे. ते एसबीडी इन्फ्रा प्रा. लि. या कंपनीत सुपरवायझर म्हणून कार्यरत होते.
दि. १० जुलै २०२६ रोजी मध्यरात्री सुमारे १२.४० वाजेच्या सुमारास पारोळा रोड ते कजगाव रोडदरम्यान कंपनीचे काम सुरू असताना ही दुर्घटना घडली. विश्व कौशिक हे एमएच-१८-सीएम-३७२९ क्रमांकाच्या दुचाकीवर असताना मागून आलेल्या एमएच-१८-बीजी-१६०२ क्रमांकाच्या महिंद्रा कॅम्परने जोरदार धडक दिली.
या धडकेत विश्व कौशिक गंभीर जखमी झाले. त्यांना उपचारासाठी हलविण्यात आले; मात्र उपचारापूर्वीच त्यांचा मृत्यू झाला.
या प्रकरणी फिर्यादी अमित अरविंद देशमुख (वय ४६, सुपरवायझर, एसबीडी इन्फ्रा प्रा. लि., रा. भडगाव) यांनी दिलेल्या तक्रारीवरून कॅम्पर चालक देवेंद्र किशोर पाटील याच्याविरुद्ध भारतीय न्याय संहिता (BNS) कलम १०६(१), २८१, १२५(अ), १२५(ब), ३२४(४) तसेच मोटार वाहन कायदा कलम १८४ अन्वये पारोळा पोलिस ठाण्यात गुन्हा दाखल करण्यात आला आहे.
या अपघाताचा पुढील तपास पोलीस हवालदार डॉ. शरद पाटील करीत असून, संबंधित वाहनचालकाविरुद्ध कायदेशीर कारवाईची प्रक्रिया सुरू आहे. मध्यरात्री झालेल्या या अपघातामुळे परिसरात हळहळ व्यक्त होत आहे.
