शिवाजीनगर परिसरातील घटना; शहर पोलिसांत अकस्मात मृत्यूची नोंद
जळगाव ( प्रतिनिधी ) – शहरातील शिवाजीनगर परिसरात राहणाऱ्या एका ३७ वर्षीय तरुणाने राहत्या घरात गळफास घेऊन आत्महत्या केल्याची धक्कादायक घटना मंगळवारी (३० जून) दुपारी उघडकीस आली. या घटनेमुळे परिसरात हळहळ व्यक्त होत आहे.
मयताचे नाव मयूर अरुण चंदनकर (वय ३७, रा. शिवाजीनगर, जळगाव) असे आहे.
मिळालेल्या माहितीनुसार, मंगळवारी दुपारी मयूर यांची आई आणि भावजयी घराच्या समोरील खोलीत बसल्या होत्या. त्यावेळी मयूर हे मागील खोलीत गेले आणि त्यांनी गळफास घेत आत्महत्या केली. काही वेळानंतर आई त्यांना बोलविण्यासाठी गेली असता, मयूर हे गळफास घेतलेल्या अवस्थेत आढळून आले.
घटनेची माहिती मिळताच शहर पोलीस ठाण्याचे पोहेकॉ प्रवीण वाघ यांनी घटनास्थळी धाव घेतली. मयूर यांना तातडीने शासकीय वैद्यकीय महाविद्यालय व रुग्णालयात दाखल करण्यात आले. मात्र, वैद्यकीय अधिकाऱ्यांनी त्यांना तपासून मृत घोषित केले.
याप्रकरणी शहर पोलीस ठाण्यात अकस्मात मृत्यूची नोंद करण्यात आली असून आत्महत्येमागील कारणाचा पुढील तपास सुरू आहे.
