यावल (प्रतिनिधी) : आर्थिक फायद्यासाठी दोन १३ वर्षीय मुलांकडून काम करून घेतल्याप्रकरणी एका व्यक्तीविरुद्ध यावल पोलीस ठाण्यात बालमजुरी प्रतिबंधक कायद्यासह विविध कलमान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, चितोडा (ता. यावल) येथे यावल-फैजपूर रस्त्यालगत सुरू असलेल्या कामावर दोन अल्पवयीन मुलांना मजुरीसाठी ठेवण्यात आल्याची बाब समोर आली. तनमय गजानन वराडे (वय १३) व अमीन रमजान तडवी (वय १३, दोघे रा. चितोडा, ता. यावल) या मुलांकडून काम करून घेत असल्याचे आढळून आले.
या प्रकरणी सचिन निवृत्ती धांडे (वय ४०, रा. चितोडा, ता. यावल) याच्याविरुद्ध गुन्हा दाखल करण्यात आला आहे. आरोपीने स्वतःच्या आर्थिक फायद्यासाठी अल्पवयीन मुलांना कामावर ठेवले. तसेच त्यांना योग्य वेतन, सुरक्षिततेची साधने, हजेरी नोंद, वेतनपत्रक व विमा संरक्षण उपलब्ध करून दिले नसल्याचा आरोप आहे.
याप्रकरणी भारतीय न्याय संहिता कलम १४६, बाल व किशोर कामगार (प्रतिबंध व नियमन) अधिनियम कलम ३ व १४(१) तसेच बाल न्याय (काळजी व संरक्षण) अधिनियम २०१५ च्या कलम ७९ अन्वये गुन्हा दाखल करण्यात आला आहे. पुढील तपास पोलीस हवालदार निलेश चौधरी करीत आहेत.
