महायुती-विरोधकांपेक्षा अपक्ष उमेदवाराचीच अधिक चर्चा; तिरंगी लढतीत वाढली उत्सुकता
जळगाव (प्रतिनिधी) : जळगाव स्थानिक स्वराज्य संस्था मतदारसंघाच्या विधान परिषद निवडणुकीची रणधुमाळी आता शिगेला पोहोचली असून बदलत्या राजकीय समीकरणांमुळे ही निवडणूक अधिकच रंगतदार बनली आहे. महायुतीचे उमेदवार नंदकिशोर महाजन आणि महाविकास आघाडीचे उमेदवार शरद तायडे यांच्यात थेट सामना होईल, अशी सुरुवातीची अपेक्षा होती. मात्र प्रहार संघटनेचे नेते अनिल चौधरी यांनी अपक्ष उमेदवारी कायम ठेवल्याने निवडणुकीत नवा ट्विस्ट निर्माण झाला आहे.
अपक्ष चौधरींनी वाढवली चुरस
स्थानिक स्वराज्य संस्थांमधील लोकप्रतिनिधींशी असलेला दांडगा संपर्क, सर्वपक्षीय नेत्यांशी असलेले संबंध आणि जिल्ह्यातील वैयक्तिक प्रभाव यामुळे अनिल चौधरी यांना या निवडणुकीतील महत्त्वाचे आव्हान मानले जात आहे. अनेक नाराज लोकप्रतिनिधी त्यांना छुपा पाठिंबा देऊ शकतात, अशी चर्चा राजकीय वर्तुळात सुरू आहे.
ताकद दाखवत केली मोर्चेबांधणी
उमेदवारी अर्ज दाखल करण्यापूर्वीच अनिल चौधरी यांनी जिल्ह्यातील विविध नगरपालिका, नगरपंचायती आणि स्थानिक स्वराज्य संस्थांमधील प्रतिनिधींना एकत्र आणत आपली ताकद दाखवून दिली होती. त्यामुळे निवडणुकीच्या गणितात त्यांचे स्थान अधिक मजबूत मानले जात आहे.
रेश्मा काळेंची माघार; चौधरी ठाम
शिवसेना (शिंदे गट)च्या नगरसेविका रेश्मा काळे यांनी उपमुख्यमंत्री एकनाथ शिंदे यांच्या भेटीनंतर उमेदवारी मागे घेत महायुतीला पाठिंबा दिला. मात्र अनिल चौधरी यांनी निवडणूक मैदानात कायम राहण्याचा निर्णय घेतला असून कोणत्याही परिस्थितीत माघार घेणार नसल्याची भूमिका स्पष्ट केली आहे.
इतिहासाची पुनरावृत्ती होणार?
जळगाव विधान परिषद मतदारसंघाचा इतिहास पाहिला तर अनेकदा पक्षीय ताकदीपेक्षा स्थानिक पातळीवरील वैयक्तिक संबंध आणि राजकीय समीकरणे निर्णायक ठरली आहेत. २०१० मध्ये अपक्ष उमेदवार मनीष जैन यांनी दिग्गज पक्षीय उमेदवारांचा पराभव करत विजय मिळवला होता. त्यामुळे यंदाही अपक्ष उमेदवाराची भूमिका महत्त्वाची ठरण्याची शक्यता व्यक्त केली जात आहे.
सर्वांचे लक्ष तिरंगी लढतीकडे
महायुतीचे नंदकिशोर महाजन, महाविकास आघाडीचे शरद तायडे आणि अपक्ष अनिल चौधरी यांच्यातील तिरंगी लढत आता अंतिम टप्प्यात पोहोचली आहे. निवडणुकीतील खरी उत्सुकता अपक्ष उमेदवार अनिल चौधरी यांच्या कामगिरीभोवती केंद्रित झाल्याचे दिसून येत असून, ते मतांचे समीकरण बिघडवतात की विजयाची बाजी मारतात, याकडे संपूर्ण जिल्ह्याचे लक्ष लागले आहे.
> जळगाव विधान परिषद निवडणुकीत महायुती आणि महाविकास आघाडीच्या उमेदवारांसोबतच अपक्ष अनिल चौधरी हे ‘किंगमेकर’ नव्हे तर थेट ‘गेमचेंजर’ ठरण्याची चर्चा राजकीय वर्तुळात रंगू लागली आहे.
