एमआयडीसी पोलिसांची कारवाई; ३.६५ लाखांचे सोन्याचे दागिने लंपास प्रकरण उघड, आरोपी महिला अटकेत
जळगाव ( प्रतिनिधी ) – जळगाव शहरातील गणेश घाट परिसरातील लेकसाईट रेसिडेन्सीमध्ये घरकामासाठी येणाऱ्या महिलेनेच दोन घरांतील सोन्याचे दागिने चोरल्याचा धक्कादायक प्रकार उघडकीस आला आहे. एमआयडीसी पोलिसांनी या प्रकरणाचा छडा लावत आरोपी महिलेला अटक केली असून तिच्याविरुद्ध चोरीचा गुन्हा दाखल करण्यात आला आहे.
पोलिसांनी दिलेल्या माहितीनुसार, लेकसाईट रेसिडेन्सी, गणेश घाट येथे राहणारे सुधा पुरुषोत्तम काबरा (वय ५९) यांच्या घरातील बेडरूममधील कपाटातून सोन्याचे दागिने चोरीला गेल्याचे निदर्शनास आले. याच परिसरात राहणारे पियुष दीपक संघवी यांच्या घरातूनही सोन्याचे दागिने गायब झाल्याचे समोर आले. या दोन्ही घरांमध्ये कामासाठी येणारी मोतीबाई राजपाल धांडेकर (वय ३९) हिनेच ही चोरी केल्याचा संशय पोलिसांना आला. तपासादरम्यान आरोपी महिलेने दोन्ही घरांतील सोन्याचे दागिने चोरल्याची कबुली दिल्याची माहिती पोलिसांनी दिली.
चोरीस गेलेल्या मुद्देमालामध्ये खालील दागिन्यांचा समावेश आहे :- दोन तोळ्यांचे सोन्याचे मंगळसूत्र – किंमत सुमारे ₹१ लाख, तीन तोळ्यांचे लांब मंगळसूत्र – किंमत सुमारे ₹१.५० लाख, १५ ग्रॅम वजनाचा सोन्याचा शॉर्ट नेकलेस – किंमत ₹७५ हजार, ८ ग्रॅम वजनाचे सोन्याचे टॉप्स – किंमत ₹४० हजार असा एकूण ₹३ लाख ६५ हजार किमतीचा सोन्याचा ऐवज चोरीस गेल्याचे तक्रारीत नमूद करण्यात आले आहे.
आरोपी महिला घरकामाच्या निमित्ताने घरात वावरत असल्याने तिने संधी साधून कपाटातील दागिन्यांवर डल्ला मारल्याचा आरोप आहे. चोरी झाल्यानंतर एमआयडीसी पोलीस ठाण्यात भारतीय न्याय संहितेच्या कलम ३०६ अन्वये गुन्हा दाखल करण्यात आला.प्रकरणाचा तपास करताना पोलिसांनी आरोपी मोतीबाई धांडेकर हिला ताब्यात घेतले असून तिला अटक करण्यात आली आहे. पुढील तपास एमआयडीसी पोलीस ठाण्याचे अधिकारी विजयसिंग पाटील करीत आहेत. या कारवाईमुळे घरकामासाठी येणाऱ्या व्यक्तींविषयी आवश्यक ती पडताळणी करण्याची गरज पुन्हा अधोरेखित झाली आहे.
