सीसीटीव्ही फुटेज व गोपनीय माहितीच्या आधारे पारोळा पोलिसांची कारवाई; हिरापूर येथील संशयित जेरबंद
पारोळा(प्रतिनिधी):- पारोळा तालुक्यातील पिंपरखेड येथील मारुती मंदिरातून चांदीचा मुकुट व चांदीच्या मासोळ्या चोरीस गेल्याच्या प्रकरणाचा पारोळा पोलिसांनी अवघ्या काही तासांत यशस्वी उलगडा केला आहे. या प्रकरणी हिरापूर येथील एका संशयिताला अटक करून त्याच्याकडून चोरीस गेलेला ६५ हजार रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, ८ जून २०२६ रोजी रात्री साडेनऊ वाजेच्या सुमारास एक अनोळखी इसम पिंपरखेड मारुती मंदिरात आला होता. काही वेळ मंदिर परिसरात थांबून दर्शन घेतल्यानंतर तो निघून गेला. त्यानंतर मंदिराचे पुजारी आसाराम त्र्यंबक पाटील (रा. बहादरपूर, ता. पारोळा) यांनी नेहमीप्रमाणे मंदिर बंद करून घरी गेले.
दुसऱ्या दिवशी ९ जून रोजी सकाळी साडेपाच वाजता मंदिराची साफसफाई करत असताना मारुती मूर्तीवरील ५० हजार रुपये किमतीचा ५०० ग्रॅम वजनाचा चांदीचा मुकुट तसेच १५ हजार रुपये किमतीच्या १५० ग्रॅम वजनाच्या चांदीच्या मासोळ्या चोरीस गेल्याचे त्यांच्या निदर्शनास आले. याप्रकरणी पारोळा पोलीस ठाण्यात भारतीय न्याय संहिता कलम ३०५ अन्वये गुन्हा दाखल करण्यात आला.
सीसीटीव्ही फुटेज ठरले महत्त्वाचे
गुन्ह्याचा तपास सुरू असताना सहाय्यक पोलीस निरीक्षक योगेश महाजन यांच्या मार्गदर्शनाखालील पथकाने मंदिर परिसरातील सीसीटीव्ही फुटेजची बारकाईने तपासणी केली. तसेच गोपनीय माहितीच्या आधारे संशयिताचा शोध घेत हिरापूर येथील हिरालाल अरुण पाटील याला ताब्यात घेतले.
चौकशीत गुन्ह्याची कबुली
पोलिसांनी विश्वासात घेऊन चौकशी केली असता, हिरालाल पाटील याने ८ जूनच्या रात्री पिंपरखेड मारुती मंदिरातून चांदीचा मुकुट व चांदीच्या मासोळ्या चोरी केल्याची कबुली दिली. त्यानंतर पोलिसांनी त्याच्या राहत्या घरातून चोरीस गेलेला संपूर्ण मुद्देमाल जप्त केला.
पथकाची उल्लेखनीय कामगिरी
या कारवाईत सहाय्यक पोलीस निरीक्षक योगेश महाजन, पोलीस हवालदार कैलास साळुंखे, संदीप सातपुते, पोलीस कॉन्स्टेबल अजय बाविस्कर, आकाश माळी, सुनील पाटील, अभिजीत पाटील, गिरीश सोनवणे आणि अनिल राठोड यांनी सहभाग घेतला.
ही कारवाई पोलीस अधीक्षक श्रीकांत धिवरे, अपर पोलीस अधीक्षक अशोक नखाते आणि उपविभागीय पोलीस अधिकारी विनायक कोते यांच्या मार्गदर्शनाखाली करण्यात आली.
सीसीटीव्ही फुटेज आणि तांत्रिक तपासाच्या मदतीने पारोळा पोलिसांनी मंदिरातील चोरीचा गुन्हा अल्पावधीत उघडकीस आणत आरोपीला अटक करून चोरीचा संपूर्ण मुद्देमाल हस्तगत करण्यात यश मिळवले आहे.
