जळगाव तालुका पोलीस व महसूल विभागाची मोठी कारवाई
दापोरा शिवारात पोलिसांना पाहून १०-१२ ब्रास वाळू रस्त्यावर फेकून आरोपी फरार
जळगाव (प्रतिनिधी) – तालुक्यातील धानोरा ते मौजे दापोरे रस्त्यावरील ‘सोनबडा’ जवळ जळगाव तालुका पोलिसांनी मंगळवारी रात्री मोठी कारवाई केली. गिरणा नदीपात्रातून अवैधरीत्या गौण खनिजाची (वाळूची) चोरी करून वाहतूक करणाऱ्या ६ टाटा हायवा आणि अशोक लेलंड कंपनीच्या गाड्या पोलिसांनी जप्त केल्या आहेत. या कारवाईत एकूण ८४ लाख रुपये किमतीचा मुद्देमाल जप्त करण्यात आला असून, आरोपी वाहनचालक व मालक पोलिसांना पाहून घटनास्थळावरून फरार झाले आहेत.
मिळालेल्या माहितीनुसार, मंगळवार, २ जून २०२६ रोजी रात्री ८:३० ते ९:३० वाजेच्या सुमारास उपविभागीय पोलीस अधिकारी आणि जळगाव तालुका पोलीस ठाण्याचे पोलीस निरीक्षक शशिकांत श्रीराम पाटील यांच्या पथकाने ही कारवाई केली. पोलिसांचे वाहन येत असल्याचे पाहून कारवाईच्या भीतीने वाहनचालकांनी स्वतःच्या फायद्यासाठी चोरलेली अंदाजे १० ते १२ ब्रास वाळू रस्त्या लगतच जमिनीवर फेकून दिली आणि वाहनांसह पळून जाण्याचा प्रयत्न केला. मात्र, पोलिसांनी पाठलाग करत ६ वाहने ताब्यात घेतली, तर आरोपी अंधाराचा फायदा घेऊन वाहने सोडून पसार झाले.
या प्रकरणी भारतीय न्याय संहिता (BNS) २०२० चे कलम ३०३(२), महाराष्ट्र महसूल अधिनियम १९६६ चे कलम ४८ (७)(८) आणि पर्यावरण संरक्षण अधिनियम १९८६ चे कलम ९ व १५ अन्वये जळगाव तालुका पोलीस ठाण्यात गुन्हा नोंदवण्यात आला आहे.
जप्त केलेली वाहने
टाटा हायवा (MH 19 C X 9171)
टाटा हायवा (MH 19 C W 9171)
अशोक लेलंड (MH 19 C Y 4739)
टाटा हायवा (MH 14 M 3368)
अशोक लेलंड (MH 46 BF 5229)
अशोक लेलंड (MH 46 BF 5139)
या सर्व वाहनांमध्ये प्रत्येकी १ ते २ घमेले वाळू आढळून आली आहे. या धडक कारवाईमुळे वाळू माफियांमध्ये प्रचंड खळबळ उडाली आहे. या प्रकरणाचा पुढील तपास पोलीस हेड कॉन्स्टेबल धनराज अजाबराव पाटील करत आहेत.
