भुसावळात सहा संशयितांविरोधात खुनाचे वाढीव कलम लावण्याची पोलिसांची तयारी
भुसावळ, (प्रतिनिधी)- शहरातील व्हीआयपीसीटी कॉलनी परिसरात जुन्या वादातून झालेल्या बेदम मारहाणीमध्ये गंभीर जखमी झालेल्या २६ वर्षीय तरुणाचा मुंबईतील सायन रुग्णालयात उपचारादरम्यान मृत्यू झाला. या घटनेमुळे भुसावळ शहरात खळबळ उडाली असून, पोलिसांकडून आता संबंधित सहा संशयितांविरोधात खुनाचे कलम वाढविण्याची प्रक्रिया सुरू करण्यात आली आहे. मृत तरुणाचे नाव मंगेश अंबादास काळे (वय २६, रा. भुसावळ) असे आहे.
पोलिसांनी दिलेल्या माहितीनुसार, मंगेश काळे हा पत्नी पायल यांच्यासह व्हीआयपीसीटी कॉलनी परिसरात वास्तव्यास होता. २९ मे रोजी रात्री सुमारे ११ वाजेच्या सुमारास तो घराच्या गच्चीवर झोपण्यासाठी गेला असता सहा जणांचे टोळके तेथे पोहोचले. जुन्या वादाच्या कारणावरून संशयितांनी त्याच्यावर लोखंडी रॉड, लाकडी दांडे आणि हॉकी स्टिकने बेदम मारहाण केली.
जीव वाचवण्यासाठी मंगेशने गच्चीवरून उडी घेतली. मात्र संशयितांनी त्याचा पाठलाग करून पुन्हा मारहाण केली. या हल्ल्यात त्याच्या डोक्यासह शरीराच्या विविध भागांना गंभीर दुखापत झाली.
मारहाण सुरू असताना मंगेशची पत्नी मदतीसाठी खाली आली असता एका संशयिताने पिस्टल दाखवत तिला धमकावल्याचा आरोप आहे. कुणालाही फोन केल्यास गोळी घालण्याची धमकी देण्यात आली. दरम्यान, ११२ क्रमांकावर संपर्क साधल्यानंतर पोलिस घटनास्थळी पोहोचले. पोलिसांची चाहूल लागताच आरोपी पसार झाले.
गंभीर जखमी झालेल्या मंगेश काळे यांना प्रथम जळगाव येथे उपचारासाठी दाखल करण्यात आले. प्रकृती चिंताजनक झाल्याने पुढील उपचारासाठी त्यांना मुंबईतील सायन रुग्णालयात हलविण्यात आले. मात्र उपचार सुरू असताना १ जून रोजी रात्री त्यांची प्राणज्योत मालवली.
मृत्यूची माहिती मिळाल्यानंतर भुसावळ बाजारपेठ पोलिसांनी आवश्यक कागदपत्रांची पूर्तता करण्यासाठी पथक मुंबईला रवाना केले. शवविच्छेदनानंतर मृतदेह नातेवाईकांच्या ताब्यात देण्यात येणार आहे.
या प्रकरणात यापूर्वीच कुंदन पठाडे, रोहित नवगिरे उर्फ दादू, विशाल गेंगाट, बाबा गेंगाट, अंकित आणि भावेश (सर्व रा. भुसावळ) यांच्याविरोधात विविध कलमान्वये गुन्हा दाखल करण्यात आला होता. आता जखमी तरुणाचा मृत्यू झाल्याने संबंधित गुन्ह्यात खुनाचे कलम समाविष्ट करण्यात येणार आहे.
घटनेनंतर भुसावळ शहरात हळहळ व्यक्त होत असून, आरोपींना तातडीने अटक करून कठोर कारवाई करावी, अशी मागणी नागरिकांकडून होत आहे. पोलिसांकडून फरार संशयितांचा शोध सुरू असून पुढील तपास वेगाने करण्यात येत आहे.
