चोपडा शहर पोलिसांची कारवाई; १२.२० लाखांचा मुद्देमाल जप्त, तीन बैल व एक वासराची सुटका
चोपडा (प्रतिनिधी) :- पिकअप वाहनातून जनावरांची अमानुष पद्धतीने वाहतूक करणाऱ्या दोघांविरुद्ध चोपडा शहर पोलिसांनी कारवाई करत गुन्हा दाखल केला आहे. या कारवाईत तीन बैल, एक वासरू आणि पिकअप वाहनासह तब्बल १२ लाख २० हजार रुपयांचा मुद्देमाल जप्त करण्यात आला.
पोलिसांनी दिलेल्या माहितीनुसार, ३१ मे २०२६ रोजी दुपारी १२.३५ वाजेच्या सुमारास चोपडा-गोरगाव रस्त्यालगत असलेल्या समर्थ लॉन्सजवळ ही कारवाई करण्यात आली. पोलिसांना मिळालेल्या माहितीनुसार संशयित वाहनाची तपासणी केली असता त्यामध्ये जनावरांची अत्यंत अमानुष पद्धतीने वाहतूक होत असल्याचे आढळून आले.
या प्रकरणी प्रथमेश सुभाष भोंबे (वय २२, रा. आडगाव भोंबे, ता. भोकरदन, जि. जालना) आणि युवराज रघुनाथ वाघ (वय २३, रा. वसई जळकी, ता. सिल्लोड, जि. छत्रपती संभाजीनगर) यांच्याविरुद्ध गुन्हा दाखल करण्यात आला आहे.
तपासादरम्यान आरोपी त्यांच्या ताब्यातील महिंद्रा पिकअप वाहन (एमएच ३० बीडी ५०४५) मधून तीन बैल आणि एक वासरू यांची वाहतूक करताना आढळले. जनावरांच्या मालकीबाबत कोणतीही वैध कागदपत्रे नसताना तसेच त्यांना पाणी, चारा किंवा आवश्यक सुविधा न देता अत्यंत कमी जागेत कोंबून वाहतूक केली जात असल्याचे पोलिसांना आढळले.
याशिवाय जनावरांची वाहतूक करण्यासाठी आवश्यक असलेला वैध परवाना देखील आरोपींकडे नसल्याचे समोर आले.या कारवाईत पोलिसांनी सुमारे १० लाख रुपये किमतीचे महिंद्रा पिकअप वाहन तसेच तीन बैल आणि एक वासरू असा एकूण १२ लाख २० हजार रुपयांचा मुद्देमाल जप्त केला आहे.
