10 लाख रुपये घेतल्यानंतर केवळ 3 लाख परत; पाचोरा तालुक्यात गुन्हा दाखल
जळगाव (प्रतिनिधी) :- मंत्रालयात क्लर्क पदाची नोकरी लावून देण्याचे आमिष दाखवून एका तरुणाची तब्बल 7 लाख रुपयांची फसवणूक केल्याचा प्रकार उघडकीस आला आहे. या प्रकरणी पिंपळगाव हरेश्वर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, ज्ञानेश्वर सुनील जाधव (वय 34, व्यवसाय शेती, रा. मोहाडे, ता. पाचोरा) यांनी याबाबत फिर्याद दिली आहे. आरोपी शिरीष मंगलनाथ जोशी (रा. पिरोळा, ता. पाचोरा) याच्याविरुद्ध फसवणुकीचा गुन्हा दाखल करण्यात आला आहे.
फिर्यादीनुसार, आरोपीने मंत्रालयात क्लर्क पदावर नोकरी लावून देण्याचे आमिष दाखवत फिर्यादीकडून टप्प्याटप्प्याने 10 लाख रुपये घेतले. मात्र प्रत्यक्षात कोणतीही नोकरी न लावता आरोपीने केवळ 3 लाख रुपये परत केले आणि उर्वरित 7 लाख रुपये परत न करता फसवणूक केली.
हा प्रकार 29 सप्टेंबर 2022 पासून ते 19 मे 2026 पर्यंत सुरू असल्याचे तक्रारीत नमूद करण्यात आले आहे. फसवणूक झाल्याचे लक्षात आल्यानंतर फिर्यादीने पोलिसांत धाव घेत तक्रार दाखल केली.
या प्रकरणी पिंपळगाव हरेश्वर पोलीस ठाण्यात भारतीय न्याय संहिता कलम 318(4) अन्वये गुन्हा दाखल करण्यात आला आहे.
या प्रकरणाचा पुढील तपास पोलीस कर्मचारी हिरालाल पाटील करीत आहेत.
