यावल (प्रतिनिधी):- तालुक्यातील चुंचाळे परिसरात विद्युत तार चोरीच्या घटना थांबण्याचे नाव घेत नसून अज्ञात चोरट्यांनी पुन्हा एकदा तब्बल ४ लाख रुपयांचे विद्युत तार चोरी केल्याची घटना उघडकीस आली आहे. गेल्या आठवड्यातही याच भागातून सुमारे २ लाख १० हजार रुपयांचे तार चोरीला गेले होते. त्यामुळे परिसरात भीतीचे वातावरण निर्माण झाले आहे.
चुंचाळे ते गायरान विद्युत उपकेंद्र तसेच नायगाव ते चुंचाळे दरम्यान विद्युत वितरण कंपनीच्या सबस्टेशनचे काम सुरू आहे. या कामासाठी सब-कॉन्ट्रॅक्टर अतुल चौधरी (रा. वड्री) हे गावठाण ११ केव्ही लाईनचे काम करत होते. काही दिवसांपूर्वी याच ठिकाणाहून पाच गाळ्यांचे तार चोरीला गेले होते. त्यानंतर काम वेगाने पूर्ण करण्यासाठी त्यांनी पुन्हा १० गाळ्यांचे तार खांबावर टाकले होते. मात्र गुरुवारी रात्री अज्ञात चोरट्यांनी हे तारही लंपास केले. चोरीस गेलेल्या तारांची किंमत सुमारे २ लाख १० हजार रुपये असल्याचे सांगण्यात आले.
दरम्यान, याच सबस्टेशनअंतर्गत राहुल दिनकर चौधरी (रा. साकळी) हे नायगाव ते चुंचाळे मार्गावर काम करत होते. त्यांच्या कामातील सात गाळ्यांचे तारही गेल्या आठवड्यात चोरीला गेले होते. त्यानंतर त्यांनी नव्याने १० गाळ्यांचे तार टाकले होते. मात्र हे तारही अज्ञात चोरट्यांनी चोरून नेल्याची घटना समोर आली असून त्यांची किंमतही सुमारे २ लाख १० हजार रुपये असल्याचे सांगण्यात आले.
दोन्ही घटनांमुळे काम करणाऱ्या ठेकेदारांमध्ये संताप व्यक्त होत असून संबंधित सब-कॉन्ट्रॅक्टरांनी यावल पोलीस ठाण्यात अज्ञात चोरट्यांविरोधात तक्रार दाखल केली आहे. पोलिसांकडून पुढील तपास सुरू आहे.
