स्थानिक गुन्हे शाखेची कारवाई; सीसीटीव्हीच्या मदतीने आरोपींचा पर्दाफाश
जळगाव (प्रतिनिधी) – जळगाव बसस्थानक परिसरात ज्येष्ठ नागरिकांची फसवणूक करणाऱ्या दोन आरोपींना स्थानिक गुन्हे शाखेच्या पथकाने अटक केली आहे. सीसीटीव्ही फुटेज आणि तांत्रिक विश्लेषणाच्या आधारे ही कारवाई करण्यात आली असून, आरोपींकडून गुन्ह्याची कबुलीही घेण्यात आली आहे.
मिळालेल्या माहितीनुसार, दि. २० एप्रिल २०२६ रोजी दुपारी एका ज्येष्ठ नागरिकाला बसस्थानक परिसरात दोन इसमांनी बोलण्यात गुंतवून ठेवले. त्यानंतर त्याच्याकडील दागिने व रोकड हुशारीने लंपास करण्यात आली. या प्रकरणी जिल्हापेठ पोलीस स्टेशन येथे गुन्हा दाखल करण्यात आला होता.
गुन्ह्याचे गांभीर्य लक्षात घेऊन पोलीस अधीक्षक श्रीकांत धिवरे यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांच्या नेतृत्वाखाली विशेष पथक नेमण्यात आले. तपासादरम्यान सीसीटीव्ही फुटेजची पडताळणी करून आरोपींचा माग काढण्यात आला.
त्यानुसार, नगरदेवळा (ता. पाचोरा) परिसरातून दोघा संशयितांना ताब्यात घेण्यात आले. त्यामध्ये अल्ताफ हसन मदारी (वय ३२), गोविंद जब्बार मदारी (वय ३१) यांचा समावेश आहे. चौकशीदरम्यान त्यांनी गुन्ह्याची कबुली दिली असून त्यांच्या साथीदाराचा शोध सुरू आहे.
या कारवाईत स्थानिक गुन्हे शाखेच्या अधिकाऱ्यांनी व कर्मचाऱ्यांनी महत्त्वाची भूमिका बजावली. पोलीस अधीक्षक, अपर पोलीस अधीक्षक तसेच उपविभागीय पोलीस अधिकारी यांच्या मार्गदर्शनाखाली ही कारवाई यशस्वीरीत्या पार पडली.
