भडगाव तालुक्यातील वडजी शिवारात घटना
भडगाव (प्रतिनिधी) :- तालुक्यातील वडजी शिवारात अज्ञात चोरट्यांनी शेतातील विहिरीवर बसवलेल्या मोटरच्या इलेक्ट्रिक केबल्सची चोरी करून तब्बल १ लाख १८ हजार ८४० रुपयांचा ऐवज लंपास केल्याची घटना उघडकीस आली आहे. याप्रकरणी भडगाव पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, फिर्यादी राजेंद्रकुमार जयराम मोरे (वय ५१, रा. वडजी, ता. भडगाव, जि. जळगाव) यांच्या शेतातील विहिरीवर बसवलेल्या मोटरची केबल अज्ञात चोरट्यांनी कापून नेली. ही घटना दि. ३ मे २०२६ रोजी सकाळी ७ वाजण्याच्या सुमारास उघडकीस आली.
चोरट्यांनी विविध शेतकऱ्यांच्या मोटारींना जोडलेल्या केबल्स कापून नेल्याचे समोर आले असून, एकूण १९ वेगवेगळ्या केबल्सचा समावेश आहे. या सर्व केबल्सची एकत्रित किंमत १,१८,८४० रुपये इतकी आहे.
या प्रकरणी भडगाव पोलीस ठाण्यात गु.र.नं. १५४/२०२६ अंतर्गत भादंवि कलम ३०३(२), ३२४(४) प्रमाणे चोरीचा गुन्हा नोंदविण्यात आला आहे. सध्या आरोपी अज्ञात असून, पोलीस त्यांच्या शोधात आहेत.
या घटनेमुळे परिसरातील शेतकऱ्यांमध्ये भीतीचे वातावरण निर्माण झाले असून, अशा प्रकारच्या चोरीच्या घटनांवर आळा घालण्यासाठी पोलिसांनी गस्त वाढवावी, अशी मागणी होत आहे.
