जळगाव (प्रतिनिधी):- जळगाव शहरालगत असलेल्या खोटे नगर परिसरातील एका निर्जन स्थळी २६ वर्षीय तरुणीवर जबरदस्तीने शारीरिक संबंध ठेवण्याचा प्रयत्न केल्याची धक्कादायक घटना उघडकीस आली आहे. तरुणीने या कृत्याला कडाडून विरोध केल्यामुळे संतापलेल्या नराधमाने तिला लाथाबुक्क्यांनी बेदम मारहाण केली आणि तिचा मोबाईल तसेच महत्त्वाची शैक्षणिक कागदपत्रे घेऊन पोबारा केला.
मिळालेल्या माहितीनुसार, ही घटना १० एप्रिल २०२६ रोजी रात्री १० वाजेच्या सुमारास हॉटेल आशीर्वाद जवळील खोटे नगर परिसरात घडली. फिर्यादी तरुणीला आरोपी भागवत गोविंद चव्हाण (रा. वाघ नगर, जळगाव) याने निर्जन स्थळी नेले. “तू मला खूप आवडतेस” असे म्हणत त्याने पीडितेशी अश्लील चाळे करण्यास सुरुवात केली. पीडितेने या गोष्टीला विरोध दर्शवला असता, आरोपीने तिला जमिनीवर पाडून तिचे कपडे फाडले आणि तिच्यावर बलात्कार करण्याचा प्रयत्न केला.पीडितेने स्वतःचा बचाव करण्यासाठी सतत संघर्ष आणि प्रतिकार केल्याने आरोपी अधिकच हिंसक झाला. त्याने पीडितेच्या पोटावर, पाठीवर, पायावर आणि डोळ्यावर लाथाबुक्क्यांनी गंभीर मारहाण केली. त्यानंतर पीडितेचा रेडमी कंपनीचा मोबाईल आणि तिची सर्व मूळ शैक्षणिक कागदपत्रे बळजबरीने हिसकावून घेऊन आरोपी घटनास्थळावरून पळून गेला.
ही घटना १० एप्रिल रोजी घडली असली तरी, फिर्यादीने ३० एप्रिल २०२६ रोजी जळगाव तालुका पोलीस ठाण्यात धाव घेऊन तक्रार नोंदवली आहे. पोलिसांनी या प्रकरणी आरोपी भागवत चव्हाण याच्याविरुद्ध भारतीय न्याय संहिता (BNS) २०२३ च्या कलम ११५(२), ३५१(२), ६२, ६४, ७४ आणि ७६ अन्वये गुन्हा दाखल केला आहे.
या प्रकरणाचा अधिक तपास जळगाव तालुका पोलीस ठाण्याचे पोलीस निरीक्षक शशिकांत पाटील यांच्या मार्गदर्शनाखाली पोलीस उपनिरीक्षक विजय देवराम पाटील करत आहेत. अद्याप आरोपीला अटक करण्यात आलेली नाही. भरवस्तीच्या परिसरात घडलेल्या या घटनेमुळे महिलांच्या सुरक्षेचा प्रश्न पुन्हा एकदा ऐरणीवर आला आहे.
