अमळनेर तालुक्यातील घटना
अमळनेर (प्रतिनिधी):- पेव्हर ब्लॉकच्या कामाचे १२ लाख रुपयांचे बिल मंजूर करून देण्यासाठी ७ टक्के दराने लाचेची मागणी करणाऱ्या नगाव बुद्रुक येथील ग्रामसेवकाला लाचलुचपत प्रतिबंधक विभागाने (ACB) ३० एप्रिल रोजी रंगेहात पकडले. रवींद्र देविदास पवार असे अटक करण्यात आलेल्या ग्रामविकास अधिकाऱ्याचे नाव असून, ही कारवाई ढेकू रस्त्यावरील केलेनगर परिसरात करण्यात आली.
सविस्तर वृत्त असे की,नगाव बुद्रुक येथे झालेल्या गटारी आणि पेव्हर ब्लॉकच्या कामाचे एकूण १२ लाख रुपयांचे बिल प्रशासकीय स्तरावर प्रलंबित होते. हे बिल मंजूर करण्यासाठी ग्रामसेवक रवींद्र पवार यांनी तक्रारदाराकडे ७ टक्के कमिशननुसार ८४ हजार रुपयांच्या लाचेची मागणी केली होती. या तक्रारीची शहानिशा केल्यानंतर ३० तारखेला लाचलुचपत प्रतिबंधक विभागाने सापळा रचल्यानंतर, ढेकू रस्त्यावरील केलेनगर येथील आपल्या राहत्या घरी ५० हजार रुपयांची लाचेची रक्कम स्वीकारत असताना एसीबीच्या पथकाने पवार यांना रंगेहात पकडले.
मिळालेल्या माहितीनुसार, मुख्य लाचेची रक्कम स्वीकारण्यापूर्वी पवार यांनी १३००० रुपये ‘फोन पे’ या डिजिटल माध्यमातून स्वीकारल्याचे तपासात निष्पन्न झाले आहे. त्यानंतर, तडजोडीअंती ५० हजार रुपये देण्याचे ठरले होते.
ही कारवाई एसीबीचे डीवायएसपी योगेश ठाकूर यांच्या मार्गदर्शनाखाली सापळा अधिकारी हेमंत नागरे, स्मिता नवघरे, दिनेशसिंग पाटील, सुरेश पाटील, बाळू मराठे, किशोर महाजन, सुनील वानखेडे, भूषण पाटील, मनोज पाटील, प्रणेश ठाकूर, अमोल सूर्यवंशी आणि सचिन चाटे यांच्या पथकाने यशस्वी केली. याप्रकरणी अमळनेर पोलीस ठाण्यात गुन्हा दाखल करण्यात आला आहे.
