दोन मजूर थोडक्यात बचावले
अमळनेर (प्रतिनिधी):- तालुक्यातील आंचलवाडी शिवारात विहिरीचे काम सुरू असताना एक भीषण अपघात घडला. माती काढणारी क्रेन थेट विहिरीत कोसळल्याने राजस्थानमधील रहिवासी असलेल्या ३२ वर्षीय क्रेन चालकाचा जागीच मृत्यू झाला. तर विहिरीत असलेल्या दोन मजुरांनी समयसूचकता दाखवल्याने त्यांचे प्राण थोडक्यात बचावले. ही घटना मंगळवारी (२८ एप्रिल) सकाळी घडली.
आंचलवाडी शिवारातील पंडित विनायक पाटील यांच्या शेतातील कोरड्या विहिरीची खोली वाढवण्याचे काम सुरू होते. मंगळवारी सकाळी ८ वाजेच्या सुमारास क्रेनच्या सहाय्याने विहिरीतील दगड आणि माती बाहेर काढली जात होती. यावेळी क्षमतेपेक्षा जास्त भार झाल्याने विहिरीच्या काठावर उभी असलेली क्रेन अचानक अनियंत्रित होऊन थेट विहिरीत कोसळली.
या अपघातात क्रेन चालक राजूलाल नारायणलाल गुर्जर (वय ३२, रा. भेरुखेडा, जि. भिलवाडा, राजस्थान) हे क्रेनसोबत विहिरीत फेकले गेले आणि त्यांचा जागीच मृत्यू झाला. ज्यावेळी क्रेन विहिरीत कोसळली, तेव्हा विहिरीच्या तळाशी दोन मजूर माती भरण्याचे काम करत होते. वरून अजस्त्र क्रेन अंगावर पडत असल्याचे पाहताच, या मजुरांनी क्षणाचाही विलंब न करता विहिरीच्या भिंतीचा आधार घेतला आणि कडेला चिकटून उभे राहिले. त्यांच्या डोळ्यादेखत क्रेन कोसळली, मात्र भिंतीला चिकटून राहिल्याने ते या भीषण अपघातातून सुखरूप बचावले.
याप्रकरणी महावीर गुर्जर यांनी अमळनेर पोलीस ठाण्यात माहिती दिली. अमळनेर ग्रामीण रुग्णालयात शवविच्छेदन केल्यानंतर राजूलाल गुर्जर यांचा मृतदेह त्यांच्या मूळ गावी राजस्थानकडे रवाना करण्यात आला. मृत राजूलाल यांच्या पश्चात आई, पत्नी आणि दोन मुली असा परिवार असून, ते सध्या जवखेडा येथे वास्तव्यास होते. याबाबत अमळनेर पोलिसात बुधवारी (२९ एप्रिल) अकस्मात मृत्यूची नोंद करण्यात आली आहे. पुढील तपास हेड कॉन्स्टेबल काशीनाथ पाटील आणि सागर साळुंखे करत आहेत.
