भुसावळ पोलिसांची मोठी कारवाई
भुसावळ (प्रतिनिधी):- भुसावळ बस स्थानकावर प्रवाशाची नजर चुकून सोन्याची पोत लंपास करणाऱ्या महिला आरोपीला भुसावळ बाजारपेठ पोलिसांनी अवघ्या काही तासांत अटक केली आहे. पोलिसांनी तिच्याकडून ३ लाख २० हजार रुपये किमतीची २२ ग्रॅम सोन्याची पोत जप्त केली असून चोरीचा गुन्हा उघडकीस आणला आहे.
मुक्ताईनगर येथील रहिवासी कुसुम देविदास चौधरी (वय ६२) या २३ एप्रिल २०२६ रोजी सकाळी भुसावळ बस स्थानकावरून चोपडा बसमध्ये चढत होत्या. यावेळी गर्दीचा फायदा घेत अज्ञात चोरट्याने त्यांच्या पर्समधील २२ ग्रॅम वजनाची सोन्याची पोत चोरून नेली होती. याप्रकरणी भुसावळ बाजारपेठ पोलीस स्टेशनला गुन्हा दाखल करण्यात आला होता. पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी केदार बारबोले यांच्या मार्गदर्शनाखाली पोलीस निरीक्षक राहुल वाघ यांनी तपासाची चक्रे फिरवली.
डी.बी. पथकाचे कर्मचारी आरोपीचा शोध घेत असतानाच, पोलीस निरीक्षक राहुल वाघ यांना गुप्त बातमीदाराकडून मिळालेल्या माहितीनुसार, या चोरीत एका महिलेचा सहभाग असल्याचे निष्पन्न झाले. मिळालेल्या माहितीनुसार पोलिसांनी तातडीने कुल्सुमबी मुश्ताक शेख (रा. यावल) हिला ताब्यात घेतले. तिची अधिक चौकशी केली असता तिने चोरीची कबुली दिली. तिच्याकडून चोरीला गेलेली ३ लाख २० हजार रुपये किमतीची २२ ग्रॅमची सोन्याची पोत हस्तगत करण्यात आली आहे.
ही कारवाई पोलीस निरीक्षक राहुल वाघ यांच्या आदेशाने डी.बी. पथकातील विजय नेरकर, कांतीलाल केदारे, सचिन चौधरी, महेंद्र पाटील, अक्षय कोतकर, योगेश माळी, चंद्रकांत रायपूरकर, जावेद शहा, भूषण चौधरी, अमर अठाडे, दिलीप कोल्हे, जिवन कापडे, हर्षल महाजन आणि शील्पा राठोड यांच्या पथकाने केली. पुढील तपास पोहेकॉ कांतीलाल रघुनाथ केदारे हे करत आहेत.
