चाळीसगाव तालुक्यातील घटना
चाळीसगाव ( प्रतिनिधी ):- तालुक्यातील एका गावात एका अल्पवयीन मुलीवर वारंवार अत्याचार करून तिचे आक्षेपार्ह फोटो सोशल मीडियावर व्हायरल केल्याची धक्कादायक घटना समोर आली आहे. याप्रकरणी चाळीसगाव ग्रामीण पोलीस ठाण्यात नराधमाविरुद्ध बलात्कार आणि पोक्सो (POCSO) कायद्यांतर्गत गुन्हा दाखल करण्यात आला आहे.
.
संशयित आरोपी रविंद्र ओंकार राठोड (रा. गोरखपूर तांडा, ता. चाळीसगाव) याने गेल्या दोन वर्षांपासून पीडित मुलीला (वय १६ वर्षे १० महिने) आपल्या जाळ्यात ओढले होते. आरोपीने पीडितेसोबतचे काही फोटो मोबाईलमध्ये काढून ठेवले होते. या फोटोंचा धाक दाखवून त्याने गेल्या वर्षी एप्रिल २०२५ मध्ये पाटणा देवी यात्रेच्या दरम्यान पीडितेला धमकावण्यास सुरुवात केली. “तू माझ्याशी मैत्री कर आणि मी सांगेल तसे वाग, नाहीतर तुझे फोटो व्हायरल करून तुझे लग्न दुसरीकडे होऊ देणार नाही,” अशी धमकी त्याने दिली होती.
आरोपीने २०२५ मधील दिवाळी सण संपल्यानंतर साधारण १५ दिवसांनी रात्रीच्या सुमारास गोरखपूर तांडा येथील शाळेच्या मागील पडिक शेतात पीडितेवर तिच्या इच्छेविरुद्ध पहिल्यांदा अत्याचार केला. त्यानंतर साधारण १५ दिवसांपूर्वी, जेव्हा पीडितेचे लग्न जमल्याची माहिती आरोपीला मिळाली, तेव्हा त्याने पुन्हा “तू भेटायला आली नाही तर तुझे लग्न मोडून टाकीन” अशी धमकी दिली. त्याने पीडितेला किसन ओंकार राठोड यांच्या घरी बोलावून पुन्हा अत्याचार केला.
एवढ्यावरच न थांबता, संशयित आरोपी रविंद्र राठोड याने इन्स्टाग्रामवर एक बनावट खाते तयार केले. त्यावर त्याने स्वतःचे आणि पीडितेचे आक्षेपार्ह फोटो व्हायरल केले. यामुळे पीडितेची मोठी बदनामी झाली आणि तिचे ठरलेले लग्न देखील मोडले.
या प्रकरणी पीडितेने दिलेल्या फिर्यादीवरून चाळीसगाव ग्रामीण पोलीस ठाण्यात गुन्हा रजिस्टर क्रमांक १०६/२०२६ नुसार भारतीय न्याय संहिता कलम ६४(२)(f), ६४(२)(m), ३५१(१), ३५६(१) सह बाललैंगिक अत्याचार संरक्षण अधिनियम (POCSO) कलम ४, ६, ८, १२, १४ आणि माहिती तंत्रज्ञान कायद्याच्या कलम ६७, ६७(A), ६७(B) अन्वये गुन्हा दाखल करण्यात आला आहे.
सदर कारवाई उपविभागीय पोलीस अधिकारी विजयकुमार ठाकूरवाड आणि सहाय्यक पोलीस निरीक्षक नितीन पाटील यांच्या मार्गदर्शनाखाली करण्यात आली. प्रकरणाचा पुढील तपास पोलीस निरीक्षक अमितकुमार मनेळ (चाळीसगाव शहर पोलीस स्टेशन) हे करत आहेत. अद्याप आरोपीला अटक करण्यात आलेली नाही.
