पाचोरा पोलिसांची धडाकेबाज कारवाई
पाचोरा (प्रतिनिधी):- पाचोरा पोलिसांनी अत्यंत वेगाने तपास चक्रे फिरवत केवळ तीन तासांच्या आत चोरीचे दोन गुन्हे उघडकीस आणले आहेत. या कारवाईत पोलिसांनी चोरीला गेलेला संपूर्ण मुद्देमाल हस्तगत केला असून एका आरोपीला ताब्यात घेतले आहे.
येथील इलेक्ट्रिक व्यावसायिक कय्युम जहांगिर देशमुख यांचे अक्सानगर, जारगाव येथील गोडावूनमधून ९४,५०० रुपये किमतीचे तीन गोदरेज कंपनीचे ए.सी. दि. १ एप्रिल ते दि. १४ एप्रिल २०२६ दरम्यान चोरीला गेले होते. याप्रकरणी पाचोरा पोलीस स्टेशनला गुन्हा दाखल करण्यात आला होता. पोलीस अधीक्षक माहेश्वर रेड्डी, अपर पोलीस अधीक्षक कविता नेरकर आणि उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार यांच्या नेतृत्वातील पथकाने या गुन्ह्याचा तपास सुरू केला.
गोपनीय माहितीच्या आधारे पोलिसांनी रिहान हमीश शहा (वय २२, रा. हनुमाननगर, पाचोरा) याला निष्पन्न करून तात्काळ ताब्यात घेतले. पोलिसांनी खाकीचा हिसका दाखवताच रिहानने चोरीची कबुली दिली. त्याच्याकडून ९४,५०० रुपये किमतीचे तीन ए.सी. हस्तगत करण्यात आले आहेत. यासोबतच पोलिसांनी दि. १५ एप्रिल रोजी दाखल असलेल्या ३० हजार रुपये किमतीची सोन्याची पोत चोरीचा गुन्हा देखील उघडकीस आणला आहे. अशा प्रकारे केवळ तीन तासांत दोन्ही गुन्ह्यांतील मुद्देमाल हस्तगत केल्यामुळे तक्रारदार आणि परिसरातील जनतेने पाचोरा पोलिसांचे कौतुक करत आभार मानले आहेत.
सदर कारवाईत सफौ विलास पाटील, पोहेकाँ वसीम शेख, श्रीकांत गायकवाड, पोकाँ योगेश पाटील, संदीप राजपूत आणि गणेश कुंवर या पोलीस कर्मचाऱ्यांनी महत्त्वाची भूमिका बजावली.
