चाळीसगावात भरवस्तीत घटना
चाळीसगाव (प्रतिनिधी) :- शहरातील राखुंडे नगर भागात एका अज्ञात चोरट्याने महिलेच्या डोळ्यात मिरचीची पूड फेकून तिच्या गळ्यातील १ लाख २० हजार रुपये किमतीची सोन्याची माळ (मिनी माळ) जबरदस्तीने हिसकावून नेल्याची धक्कादायक घटना घडली आहे. याप्रकरणी चाळीसगाव शहर पोलीस ठाण्यात गुन्हा दाखल करण्यात आला आहे.
फिर्यादी प्राजक्ता प्रतीक पाटील (वय २६, रा. राखुंडे नगर, मालेगाव रोड) या दि. १३ मार्च २०२६ रोजी रात्री ९ वाजेच्या सुमारास आपल्या घरासमोर उभ्या असताना ही घटना घडली. त्या ठिकाणी दबा धरून बसलेल्या एका अज्ञात मोटारसायकल स्वाराने अचानक प्राजक्ता यांच्या जवळ येऊन त्यांच्या तोंडावर मिरचीची पूड फेकली. काही समजण्याच्या आतच चोरट्याने त्यांच्या गळ्यावर थाप मारून, १ लाख २० हजार रुपये किमतीची साधारण १५ ग्रॅम वजनाची सोन्याची पोत (मिनी माळ) हिसकावून तोडली. त्यानंतर चोरटा आपल्या मोटारसायकलवरून मालेगावच्या दिशेने वेगाने पसार झाला.
या घटनेबाबत फिर्यादीने दिलेल्या तक्रारीवरून चाळीसगाव शहर पोलीस ठाण्यात गुन्हा दाखल करण्यात आला आहे. पोलीस उपनिरीक्षक योगेश माळी तपास करित आहेत. भरवस्तीत आणि वर्दळीच्या वेळेत घडलेल्या या घटनेमुळे परिसरात भीतीचे वातावरण पसरले असून, पोलिसांनी नागरिकांना सतर्क राहण्याचे आवाहन केले आहे.
