शेतकऱ्यांना अत्याधुनिक तंत्रज्ञानाचा लाभ
जळगाव ( प्रतिनिधी ):- शेतकऱ्यांना आधुनिक शेती तंत्रज्ञान उपलब्ध करून देऊन शेती अधिक उत्पादनक्षम व किफायतशीर करण्याच्या उद्देशाने जिल्हा परिषद जळगावच्या कृषी विभागामार्फत विविध उपक्रम राबविण्यात येत आहेत. याच अनुषंगाने जिल्हा परिषदेच्या मुख्य कार्यकारी अधिकारी मिनल करनवाल यांच्या संकल्पनेतून शेतकऱ्यांना अत्याधुनिक तंत्रज्ञानाची साधने उपलब्ध करून देण्याचा उपक्रम हाती घेण्यात आला आहे.
या उपक्रमाअंतर्गत शेतकऱ्यांना ड्रोन व स्लरी फिल्टर या आधुनिक उपकरणांचा पुरवठा करण्यात येत आहे. शेतीमध्ये औषध फवारणी अधिक अचूक, जलद व कमी खर्चात करण्यासाठी ड्रोन तंत्रज्ञान उपयुक्त ठरत असून सेंद्रिय शेतीला चालना देण्यासाठी स्लरी फिल्टरचा वापर प्रभावी ठरत आहे.
जिल्हा परिषद जळगावने आपल्या सेस निधीतून ड्रोन खरेदीसाठी ५५ लक्ष रुपये तसेच स्लरी फिल्टरसाठी १४ लक्ष रुपये अशी आर्थिक तरतूद केली आहे. या माध्यमातून आतापर्यंत जिल्ह्यातील ८ शेतकऱ्यांना ड्रोन तर ८७ शेतकऱ्यांना स्लरी फिल्टर यांचे वाटप करण्यात आले आहे.
या उपक्रमामुळे शेतकऱ्यांना आधुनिक तंत्रज्ञानाचा लाभ मिळून शेतीची कार्यक्षमता वाढण्यास मदत होणार असून जिल्ह्यातील शेती अधिक प्रगत व शाश्वत करण्याच्या दिशेने हा महत्त्वाचा टप्पा ठरणार असल्याचे प्रशासनाकडून सांगण्यात आले.
