मुक्ताईनगरजवळ भीषण अपघात
मुक्ताईनगर ( प्रतिनिधी ) – मुक्ताईनगर शहरानजीक असलेल्या राष्ट्रीय महामार्ग क्रमांक ५३ वर हरताळा फाट्याजवळील उड्डाणपुलाखाली भीषण अपघात झाला. एका भरधाव अर्टिका कारने रस्त्याच्या कडेला उभे असलेल्या पाच जणांना जोरदार धडक दिली. या अपघातात पाचही जण जखमी झाले असून, कारमध्ये सापडलेल्या संशयास्पद वस्तूंमुळे खळबळ उडाली आहे.
गुरुवार दि. १२ मार्च रोजी सकाळी हरताळा फाट्याजवळील उड्डाणपुलाखालील बोगद्याकडे एक अर्टिका कार अत्यंत वेगाने येत होती. कारचालकाचे वाहनावरील नियंत्रण सुटल्याने ही कार थेट रस्त्याच्या कडेला उभ्या असलेल्या नागरिकांच्या अंगावर जाऊन धडकली. धडकेचा आवाज ऐकताच परिसरातील नागरिकांनी घटनास्थळाकडे धाव घेतली. या अपघातात पाच जण जखमी झाले आहेत.
प्रल्हाद काळू पाटील, सलीम शेख, मुरली कोळी, काशिनाथ साळुंखे, ज्ञानेश्वर कोळी या जखमींना नागरिकांनी तात्काळ उपजिल्हा रुग्णालयात हलवले. यापैकी दोघांची प्रकृती गंभीर असल्याने त्यांना पुढील उपचारासाठी जिल्हा रुग्णालयात हलवण्यात आले आहे. अपघात झाल्यानंतर कारचालक आणि कारमधील इतर प्रवासी वाहन सोडून घटनास्थळावरून पसार झाले.
मात्र, या अपघातग्रस्त कारला मागे दोन वेगवेगळ्या नंबर प्लेट्स लावलेल्या आढळून आल्या आहेत. धक्कादायक बाब म्हणजे, कारच्या तपासणीत आतमध्ये पोलिसांची काठी आणि खाकी वर्दी सापडल्याची प्राथमिक माहिती समोर येत आहे. घटनेची माहिती मिळताच पोलीस नाईक संदीप वानखेडे व शिपाई दीपक ठाकरे यांनी घटनास्थळी धाव घेऊन पंचनामा केला.
